Shoddo 90 - Kafa Linguistics Project

AWUDDINNEE KUXO ( Shoddo 90–106 ) Asho Hakkaallo Tunoonaa Yeeri Giidecho Tunoona

Yeer asho Muusi corootiti corooto

¹ Doono Yeero, shiijjeroochee shiijjerooch beddaahaa, ne nooch deebo neene.

² Guudinaꞌo shuuneyaan beetaa, showoonaa alemoona halleyaan beetaa, bulli aaboochee bulli aabooch ne, Nuggishoo neene.

³ Ashoon showa wochihine; “Ashi bushiisheenaꞌote, ittoshi xaaꞌooch wottebote” iyine.

⁴ Hume nato ne aafoochaa yiichiyoommone; besheti ikke qemoommone; xumi qamini saatoommone.

⁵ Asheenaꞌon gumochoommon aalliihine; maaddoona nolliibeeti mocoomminaꞌone.

⁶ Mocoo maaddoona dicciꞌi bungiye; tunebaani womikka shoolliꞌi shuuqqiye.

⁷ Ne kaaroona aalleto noone; ne kaaree shiixxoona keqqito noone.

⁸ No gondoon ne aafooch yaggihine; aasheexi no axaaxoon ne aafooch, xalla bekkiihine.

⁹ No yemeeno bulli ne kaaroona beshehe; no eenoo hiinnoommone.

¹⁰ No eeno shabe natone; no kupphegaatoo shinne natone; halla ebiyoo aayonaa xuuxoona ceennitone; no eeno kaateree ciiremmone; nowoo beshemmo noone.

¹¹ Neen shattii beetinaꞌo ne kaaree shiixxoon ariyoommon, kupphe ne kaaroon ariyemmo konine? Ne kaaree shiixxoo neen shatoommi oogoone.

¹² Shalligechi mullechon no tunemmoyich, no eenon aabichi no haddemmo gaata nooch dojjibe.

¹³ Doono Yeero, noon ne kaare beeyemmo aati wottooniye? Ne guuno no waan wotteree, nooch ariqqebe.

¹⁴ No yemeeno bulliich shoddebee oogichi no emiremmoyich, maaddi maaddoona ne shoodoona noon digaayiibe.

¹⁵ Meeti aaboon xuuxoon nooch bekkiito neene; meeti naton gondoon beeggeto noone; and illa bi keroon noon emirikkibe.

¹⁶ Giidechi ne shuunoo ne guuno nooch, ne oogoo no bushiisheenaꞌoyich, bekkebe.

¹⁷ No Doono, no Nuggishoocho, ne ariqqo no toommooch tunebe; no shuunoon nooch kaachibe; eeha, no shuunoon nooch kaachibe.