Shoddo 9 - Kafa Linguistics Project

Dayinnetechi Yeerich Giddeebeeti Galleto

Shoddechinaꞌochi ukkiroyich shoddeeti Daawitichi shoddo

¹ Doono Yeero, ta ceeni mulloona neen galletemmo taane; worganikkiti ne shuunoo bullichon yibbaatemmo taane.

² Neenna emiri wucwuccemmo taane; Beshoo Yeero, ne shigoyich galletee shoddoon shoddemmo taane.

³ Ta etteenaꞌo gubb wottemminaꞌone; tepheeree ne aafoochee aallemminaꞌone.

⁴ Ne, taatee qeenooch kotaachaa dayinnetoona nallihine; ta taggoon beeggaꞌa tachii nallihine.

⁵ Aageteenaꞌon kaarehine; gondeenaꞌon aalliihine; boonoshi shigo bulli yemeenoon batteyemmoyich tuniihine.

⁶ No etteenaꞌo bulli yemeenee aalloona aalleheete; boonoshi katemeenaꞌon happihine; illa boonoshin shalligemmo aalloone.

⁷ Tunebaani Doono Yeeri bulli yemeenoon taatehe; bi taatee qeenon nalloyich qanniitone;

⁸ showee toommooch dayinnetoona nalliye; macceenaꞌo toommooch tatoona nalliye.

⁹ Doono Yeeri xukketinaꞌoyich deeboone; xuuxee aabooboo mishigoone.

¹⁰ Doono Yeero, neen gibenee beetinaꞌon dufaano ne tunetoyich, ne shigoon arii beetinaꞌo bulli neen gibeneheete.

¹¹ Tsiyoon beeti Doono Yeerich galletee shoddoon shoddebote; bi shuunoon macceenaꞌo daggooch yibbaatebote.

¹² Damee nichoon gaaccecho boonoshin bi gabii beetoyich, xukketinaꞌochi eefon batteyaache.

¹³ Doono Yeero, taach ariqqebe; ta etteenaꞌo taan xuuxii beeton ciine; maash hamoochee taan wodiibe.

¹⁴ Ebin ne tuniigaata, Tsiyooni addibaaboochaa ne galleto bullin gettemmo taane; taan ne wodiyoona emiremmo taane.

¹⁵ Aageteenaꞌo boonoshi iijjiti oppooch dihiyeete; boonoshi olleti ollooch boonoshi baatoo yechehe.

¹⁶ Doono Yeeri dayinnetechi nalloona bi qelloon arichiihe; gondeenaꞌo boonoshi gonde shuunoona olleeheete.

¹⁷ Gondeenaꞌo maash hammemminaꞌone; Yeerin batteebeeti aageteenaꞌo arooch hammemminaꞌone.

¹⁸ Iritechinaꞌo bulli aaboon battee echeyaachemminaꞌone; girechinaꞌochi gibeno bulli yemeenooch aalle echeyaachemmone.

¹⁹ Doono Yeero, tibe; asho sharaaye; ne aafoochaa aageteenaꞌo toommooch nalleebe.

²⁰ Doono Yeero, boonoshi shattemmoyich tuniibe; aageteenaꞌo asho boonoshi tunoon ariibeete.