Shoddo 89 - Kafa Linguistics Project

Xuuxee Aaboobee Shoddo

Iziree asho Etaanichi shoddo

¹ Doono Yeero, ne shoodoon bulli yemeenoon shoddemmo taane; ne gibeneyoon ta noonoona shiijjeroo bullich awaajjemmo taane.

² Ne shoodo bulli yemeenoon manjoo bi tunoon, ne gibeneyoo shimaayoochoommon manjii bi neexoon, gettemmo taane.

³ Newoo “Ta kaaccetona tookkaa wogoon giyehoye; ta guuno Daawitich ishichaꞌa wogehoye:

⁴ ‘Ne yareenaꞌon bulli yemeenoon taatiyemmo taane; ne taatee qeenon shiijjeroo bulliich manjiyemmo taane’ iyoye” ito neene.

⁵ Doono Yeero, gaakkechi ne shuunoon shimaayeenaꞌo galletebeete; ne gibeneyoon shimaayeexi yaafeenaꞌochi iitoo galletebe.

⁶ Shimaayooch Doono Yeerin shaahemmo konine? Shimaayeexi halleenaꞌo daggooch Doono Yeerina tatemmo konine?

⁷ Shimaajji iitee daggoochaa Yeeri shattiitone; bi guudoona beetinaꞌo bulliyee beshoon oogoonaa shattiitonane.

⁸ Beshe Mawe Nuggishoo Doono Yeero, neenoommi hakkecho konine? Doono Yeero, ne bulli mooyona gibeneeto neene.

⁹ Giidechi baharoo neech hajjeehe; aachi aayo tiyiyooboo bi cikkiyemmoyich tuniihine.

¹⁰ Rahaabi getteebeeti cooxon qiccaa wuxihine; giidechi ne mochoona ne etteenaꞌon shaccehine.

¹¹ Shimaayoo neechone; showoo neechone; alemoonaa bi daggooch beeto bullinon hallito neene.

¹² Dambi-waaninaa deshi-waaninon hallito neene; Taaboorinaa Hermoonina ne shigoyich emiroona shoddeheete.

¹³ Giidechi mochecho neene. Ne kishoo kupphoone; ne qanne kishoo kaama tiyitone.

¹⁴ Ne taatittino bi neexeto cadiqoonaa dayinnetoona toommoochiye; ne shuunoo bullin shoodoonaa gibeneyoona tuniihine.

¹⁵ Doono Yeero, ililoon ariibeeti, ne aafeexi bekkoona hammiibeeti, asho diireetone.

¹⁶ Ne shigoona heeyo bullin emiriyeete; ne cadiqittinoona kaama qaalliyeete.

¹⁷ Boonoshich worganeeti hakkoon immehine; gaawe aafoona noon ne ciinona giidechon tunehone.

¹⁸ No gaachoo Doono Yeeri nooch immitone; no taatoo Israꞌeelee Yaafoo waanee waatone.

Yeeri Daawitich Gibenikkiti Gibeno

¹⁹ Gibeneeti ne guunoyich wonna ishichaꞌa yaaꞌoona getteto neene: “Ikke ginee anaamon gaachehoye; asheenaꞌo daggoochee ta kaaccetoyich oogoon immehoye.

²⁰ Ta guuno Daawitin danehoye; yaafeeti ta zayitoona biin huuttehoye.

²¹ Ebich ta kishoo bulli aabooch biinna tookki tunemmone; ta mochoo biin kupphiyemmone.

²² Bi etto bi toommooch sharaachemmone; gonde asho biin giishiyaachemmone.

²³ Bi etteenaꞌon bi aafoochaa yiikkemmo taane; biin shixxii beetinaꞌon yexi dichemmo taane.

²⁴ Ta gibeneyoonaa ta shoodoona biinna tookki tunemmone; ta shigoona kaama kaama ciixemmone.

²⁵ Bi taatittinoon baharee beqachi showooch beddaahaa, aachee beqachi showooch beddaahaanoo, gamichemmo taane.

²⁶ Biyoo ‘Ne ta Nihoo, ta Nuggishoo neene; taan wodiyechi ta deebe xaqqo neene’ geti ceeggemmone.

²⁷ Tawoo biin ta gutenee bushoo tuniyemmo taane; showee toommeexi taateenaꞌoyee beshi oogemmone.

²⁸ Ta shoodoon bulli yemeenoon biich tuniyemmo taane; biinna tookkaa ta giyeti wogo manji beeyemmone.

²⁹ Bi shiijjeroon bulli yemeenoon, bi taatee qeenonoo shimaayoo manjiꞌi beemoommon, manjiyemmo taane.

³⁰ “Bi bushiisheenaꞌo ta sheeroon quyo boonoshi qayigaata, ta doyoona hamon boonoshi qayigaata,

³¹ ta qociyoon boonoshi happigaata, ta geteenaꞌon quyo boonoshi qayigaata,

³² boonoshi axaaxoyich gumboona, boonoshi xuꞌoyichoo arengoona, boonoshin sheeremmo taane.

³³ Tunebaani ta shoodoon bi waanee wokkiyaachemmo taane; ta gibeneyoonoo shappayaachemmo taane.

³⁴ Biinna tookkaa ta giyeti wogoon biishaachemmo taane; ta noonoochee kechiti qaaroon shaddaachemmo taane.

³⁵ Ta yaafittinoona ikke wottoon ta wogetoyich, Daawitich kootaachemmo taane.

³⁶ Bi shiijjeroo bulli yemeenoon beeyemmone; bi taatee qeenoo aaboochoommon ta aafooch beeyemmone.

³⁷ Shimaayoochaa miixoo tunaꞌa beeti agenechoommon, bulli yemeenoon manjiree beeyemmone” iye.

Taatoo Koyaa Bi Wottetoyich Ayinoo

³⁸ Tunebaani ne kaacceton and duppaa qajjehine; ne huuttetonoo oogichaa kaarehine.

³⁹ Ne guunona tookkaa ne giyeti wogoon biichehine; bi gubbichoonoo showooch duppaꞌa eeꞌiihine.

⁴⁰ Bi xaqqee uxeroo bullin tiichehine; bi mishigeenaꞌonoo happihine.

⁴¹ Aroona beshemmo bulli biin boggiye; bi giyeenaꞌonoo cooneehe.

⁴² Bi etteenaꞌo bi toommooch sharemmoyich tuniihine; bi etteenaꞌo bulli emiremmoyich tuniihine.

⁴³ Aci bi goraadoon duciihine; koyoochaanoo biin gaachoon qajjehine.

⁴⁴ Taatittinee gumboon bi kishoochee tiijjihine; bi taatee qeenon showooch qixehine.

⁴⁵ Aabaalloon bi geenemmoyich tuniihine; yeelloona bi aafoon bi kaappemmoyich tuniihine.

⁴⁶ Doono Yeero, ebi aati wottooniye? Bulli yemeenoon ne qelloon aachi beeyemmo neene? Ne kaaro qaaqqoochoommon bi aaxxe beeyemmo aati wottooniye?

⁴⁷ Doono Yeero, ta eeno am shaahoon qamino gaata gabibe! Ashi bushiishoo bullin ne hallito duubooniye?

⁴⁸ Qitoona daneyaanoon cikki kashoona beeyemmi asho konine? Maash hamoochee bi qelloon wodiyoo hakkemmo konine?

⁴⁹ Ta Doonocho, ne gibeneyoona, Daawitich ne wogeti wonnee ne shoodo aaye?

⁵⁰ Ta Doonocho, ne guuno ta, am shaahoon ta cooqqireeto gaata, macceenaꞌochi naagoon haaꞌiyoona am shaahoon ta xuuxeto gaata, gabibe.

⁵¹ Doono Yeero, ne etteenaꞌo ne huutteton naaggiyeete; bi hammimmo bulliichaa biin cooneheete.

⁵² Doono Yeeri bulli yemeenoon diireebe! Ameena, ameena.