Shoddo 86 - Kafa Linguistics Project

Gaachee Danoyich Corooteeti Corooto

Daawiti corootiti corooto

¹ Doono Yeero, girechonaa amaalli hulloona ta tunetoyich, ne waamon ta waan gaꞌiiree ta qolloon waayebe.

² Neech gibeneeto ta tunetoyich, ta kasheen quyebe; ne, ta Nuggishoo neene; neen gibeneti ne guuno taan wodiibe.

³ Heeyo bullin ne waan cookaabeeto taane; ta Doonocho, taach ariqqebe.

⁴ Ta kashe neen dego tuniitine; ta Doonocho, ne guunochi kasheen emirikkibe.

⁵ Ta Doonocho, ne, deꞌoonaa maarechona neene; neen ceeggiibeeto bullich, wodde shoodecho neene.

⁶ Doono Yeero, ta corootoon ellebe; ta cookaabeeti cookoon waayebe.

⁷ Ta qolloon waayemmo ne tunetoyich, ta xuuxee aabooba ne waan cookemmo taane.

⁸ Ta Doonocho, nuggisheenaꞌo daggooch neenoommi nuggishoo aalloone; ne tuniitoommon tuniito, koniyoona aalloone.

⁹ Ta Doonocho, ne halliti aagetoo bulli waaree, ne aafooch goyinnemmone; ne shigoonoo oogiyemmone.

¹⁰ Ebiyoo oogoo ne tunetoyich, worganeeti mooyonoo ne tuniitoyichiye; ne ikkeeto baach Nuggishoo neene.

¹¹ Doono Yeero, neech gibeneyoona ta beeyemmoyich, ne gommon taach dojjibe; mulloon guttiyaanoon neen ta shattemmoyich tuniibe.

¹² Ta Doono ta Nuggishoocho, ta ceeni mulloona neen galletehoye; bulli yemeenoon ne shigoon oogiihoye.

¹³ Ebiyoo ne shoodo taach oogeto bi tunetoyichiye; maash hamoocheenoo taan ne wodiitoyichiye.

¹⁴ Yeero, geecechinaꞌo ta toommooch tiyitinaꞌone; maacmanjeenaꞌochi guupho ta kasheen qaawii beetone; neenoo mooch haddaaneenaꞌone.

¹⁵ Ta Doonocho, ne, maarechi, ariqqechi Nuggishoo neene; kaaroyich nibbecho neene; ne shoodoonaa gibeneyoona woddoone.

¹⁶ Ta waan wotteree taach ariqqebe; ne guuno taach giidoon imbe; ne gonneechi bushoo taan wodiibe.

¹⁷ Doono Yeero, taan ne gaachoonaa ne goggiyoonon, taan shixxii beetinaꞌo beegiree yeellemmoyich, taan gaawe aafoona ne ciinni malletoon taach bekkiibe.