Shoddo 84 - Kafa Linguistics Project

Yeerichi Kexon Qaatoo

Shoddechinaꞌochi ukkiroyich, shumburoona Qoraahi bushiisheenaꞌochi shoddo

¹ Beshe Mawe Doono Yeero, ne yaafee kexo am shaahoon macecikkitone.

² Doono Yeerichi addibaaboon ta kashe oogichaꞌa sharaatehane; beeyechi Nuggishoo Yeerich, ta mullo, ta meenoo emiroona shoddebe.

³ Ta Taatoo, ta Nuggishoo, Beshe Mawe Doono Yeero, ne deejjee gudee gaꞌooch gaashikafee kexon haggahane; gishiishi kafeenaꞌoo boonoshi qellich, boonoshi bushiishoon boonoshi geddemmoyichoo, kexon daneheete.

⁴ Bulli aaboon shoddoona neen galleteebee, ne kexooch beetinaꞌo diireetinaꞌone.

⁵ Boonoshi giidoo neen tuniitinaꞌo, damba Tsiyooni boochoon boonoshi mulloona gabii beetinaꞌo, diireetinaꞌone.

⁶ Baki getteebeeti bamboona boonoshi beshehooba, aaco xuuphi ufemmone; qaabbe amiyo kote aacinaꞌooch ceennemmone.

⁷ Boonoshiyoo giide giide hammemminaꞌone; nuggisheenaꞌochi Nuggishoo Tsiyoonaa bekkemmone.

⁸ Beshe Mawe Nuggishoo Doono Yeero, ta corootoon waayebe; Yaaqobichi Nuggishoocho, elle waayebe.

⁹ Yeero, no gaachoon tuneti no taatoo waan ciine; ne huutteton gaawe aafoona ciine.

¹⁰ Bare xaaꞌooch hume qemon kotoyee, ne addibaabooch ikke heeyon heeyo gaawiye. Gondeenaꞌochi duukkaanooch beemoyee, Yeerichi kechi kellooch neexoon shunnoye.

¹¹ No Nuggishoo Doono Yeeri nooch aaboommonaa gaachoommonane; biyoo gaawe aafoona noon ciinnemmone; oogoonoo nooch immemmone. Doono Yeeri, kaamoona hammii beetinaꞌoyich, deꞌe mooyon ciroona muccii ariyaanoone.

¹² Beshe Mawe Doono Yeero, neen gibeneebeeti asheenaꞌo diireetinaꞌone.