Shoddo 83 - Kafa Linguistics Project

Israꞌeelee Etteenaꞌo Dihemmoyich Corooteeti Corooto

Asaafichi galletee shoddo

¹ Yeero, cikki qajjaahine; Yeero, amoonolla tuniyaanoon cikki koteyaahine.

² Ne etteenaꞌo ne toommooch tiyitinaꞌone; neen shixxii beetinaꞌo, kaama ciixetinaꞌone.

³ Ne asheenaꞌo toommooch gondoon gabiyeete; ne quyaa beetinaꞌo toommooch koceeheete.

⁴ Boonoshiyoo, “Ittoshi waataa boonoshi taatee showoon aalliibone; Israꞌeelee shigo ciroona bi batteyemmoyich tuniibone” iyeete.

⁵ Boonoshiyoo ikkotteꞌi koceeheete; ne toommooch timoyich wogoon giyiheete.

⁶ Eboshiyoo, Edoomee asheenaꞌonaa Ishmaꞌeeleenaꞌona, Moꞌabee asheenaꞌonaa Hagaareenaꞌona,

⁷ Gebaaleenaꞌo, Amooneenaꞌonaa Amaleeqeenaꞌona, Filsixeemeenaꞌonaa Xirooseenaꞌonane.

⁸ Asooriyoo Looxichi bushiishoon gaachoona boonoshina tookkii ikkottetone.

⁹ Miidiyameenaꞌo toommooch ne tuniitoommon, Qishooni aacoochaa Siseerinaa Yabiininochi toommooch ne tuniitoommon, boonoshi toommooch tuniibe.

¹⁰ En Dooraa boonoshin aalliihine; boonoshi dubeno showooch duppeꞌi oqqiye.

¹¹ Oreebinaa Zeebinochi toommooch ne tuniitoommon boonoshi ukkireenaꞌo toommooch tuniibe. Zebaahinaa Tsalmuninochi toommooch ne tuniitoommon, boonoshi iraasheenaꞌo toommooch tuniibe.

¹² Boonoshiyoo “Yeerichi asheenaꞌo iristoon woraashibone” itinaꞌone.

¹³ Ta Nuggishoocho, boonoshin quttoommon, yongo daammiibeeti maaxxoommonoo, tuniibe.

¹⁴ Qaaqqoo shaaroon mamoommon, qaaqqee nalloo guudinaꞌon michoommon, michi aalliibe.

¹⁵ Ne yuboona boonoshin yoohe; ne aachi aayonoo boonoshin keqqichibe.

¹⁶ Doono Yeero, boonoshin yeelliiree, neech yiti boonoshi hajjeyemmoyich tuniibe.

¹⁷ Yeellebeete; bulli yemeenoon geewibeete; cooneereeshoo aallebeete.

¹⁸ Ne shigo Doono Yeeri tuneti ne baach, showoo bulli toommooch Beshoo Yeeri ne tunoon ariibeete.