Shoddo 81 - Kafa Linguistics Project

Baaree Shoddo

Shoddechinaꞌochi ukkiroyich, shumburoona Asaafichi shoddo

¹ No giidoo tuneti Yeerich emiroona shoddebote; Yaaqobichi Nuggishoyich ililibote.

² Shoddoon yagote; kamboon yexote; ooge ximboona, masinqoonoo gaawe qaaroon waayiibote.

³ Batti batti agenee keyooba, no baaree aabooba, ceeni agenee bekkehooboo, shametoon hugote.

⁴ Ebi Israꞌeeleenaꞌoyich icheti qociyoo, Yaaqobichi Nuggishoo getoone.

⁵ Gibitsee boonoshi keyiyooba, ebin Yooseefich qociihe. Ishichiibeeti ta ariyaani qaaroon waayehoye:

⁶ “Ta, ne gogoochee shaagoon kindiihoye; ne kishoo magge shuunoochee kashehe.

⁷ Ne duꞌehooba taan ceeggehine; tawoo neen wodiihoye; gigeebeeti qere xaaꞌoochaa ne qolloon waayehoye; Meriibi aacoochaa neen phiree beeggehoye.

⁸ “Ta ashoocho, ta meeqqeqqoon waayebe; Israꞌeelo, taachon ne waayegaata amo beete!

⁹ Dallaawe nuggishoo ne daggooch beeyaaye; bare nuggishoyich goyinneyaahine.

¹⁰ Gibitsee showoochee neen kichiti, ne Nuggishoo Doono Yeeri taane; taan qollebe; neech qaawii beeton immemmo taane.

¹¹ “Tunebaani ta asho ta qaaroon waayeyaanoone; Israꞌeeli taach deꞌa getaanoone.

¹² Ebich babbere boonoshi mulloona boonoshi hammemmoyich, boonoshi gaba boonoshi heechemmoyich, qixehoye.

¹³ “Ta asho taachon bi waayeto gaata, Israꞌeeli ta gommona bi hammito gaata,

¹⁴ kaateree boonoshi etteenaꞌon giishiiyesho taane; boonoshi etteenaꞌo toommooch ta mochoon tiijjesho taane.

¹⁵ Taan shixxii beetinaꞌo taan shati yitteshinaꞌone; bulli yemeenoon naxeyeshinaꞌone.

¹⁶ Tunebaani ittoshich gaawe teepphoon maanjesho taane; xaqqee gogginoochee kechiibeeti eeyona ittoshin michiyesho taane” iye.