Shoddo 80 - Kafa Linguistics Project

Israꞌeelee Taatittino Wochinnoon Bi Neexemmoyich Corooteeti Corooto

Shoddechinaꞌochi ukkiroyich, Asaafichi shoddo

¹ Israꞌeelee Qiddoocho, Yooseefi shiijjeroon bagoochoommon yaabaa beetocho, no qolloon waayebe. Kiruubeenaꞌochi toommooch kotaabeetocho, aaxxe bekkebe!

² Efreemichi, Biiniyaaminaa Minaasinochi aafooch bekkebe; ne giidoon bekkiibe; noon wodiyoyichoo wobe.

³ Yeero, ebiyee aafi no beemooch noon wochibe; no wodemmoyich ne aafoon nooch biriibe.

⁴ Beshe Mawe Nuggishoo Doono Yeero, ne asheenaꞌochi corootoon waayee qayona, ne kaare beeyemmo aati wottooniye?

⁵ Acimoon maayoochoommon boonoshich maanjihine; xoofee ceeni acimoon boonoshich uchihine.

⁶ No giyeenaꞌo no showoon deꞌoyich, boonoshinaa boonoshina koyemmoyich tuniihine; no etteenaꞌo no toommooch miicciyeete.

⁷ Beshe Mawe Nuggishoocho, ebiyee aafi no beemooch noon wochibe; no wodemmoyich ne aafoon nooch biriibe.

⁸ Woyinee qomboon Gibitsee deebehine; aageteenaꞌon yookkaachaa boonoshi showooch bechihine.

⁹ Bi guudeexi mocoon dappehine; cammon awurehe; dicciꞌi showoona ceenniye.

¹⁰ Bi yiiroo guudinaꞌon qeriye; bi ateenaꞌoo giidechi yigeenaꞌon qeriyeete.

¹¹ Bi waamon Meditiraanee baharooch beddaahaa, bi atoonoo Efiraaxisi aacooch beddaahaa, yaggiye.

¹² Ishigaata amoyich bi guudoona beeti xaqqee uxeroon happinne? Ebiichee tiyitona aroona besheebeeto bulli bi aafoon kuxxii maahe.

¹³ Kubbi gudininaꞌo neexxii koteheete; kubbi cooxinaꞌo maaheete.

¹⁴ Beshe Mawe Nuggishoocho, wochinnoon no waan wottebe; shimaayoochaa dugilla ciine; ebi woyinee qomboon quyebe.

¹⁵ Ebi, ne qanne kishoona ne bechiti, bi diccemmoyichoo ne tuniiti woyinee qomboone.

¹⁶ Etteenaꞌo arooch qaaqqoo geddiyeete; kuxxiinoo duppiyeete; boonoshin ne kaaretaa aallebeete.

¹⁷ Tunebaani ne qannooch koteti ashi toommooch, ne qellich ne kupphiiti ashi bushoo toommooch, ne kishoon yaggibe.

¹⁸ Illa ne waanee gubb wotteyaachemmo noone; kashoona no beeyemmoyich tuniibe; nowoo neen galletemmo noone.

¹⁹ Beshe Mawe Nuggishoo Doono Yeero, ebiyee aafi no beemooch noon wochibe; no wodemmoyich ne aafoon nooch biriibe.