Shoddo 8 - Kafa Linguistics Project

Yeerichi Oogee Yiiroonaa Ashi Oogoona

Shoddechinaꞌochi ukkiroyich, shumburoona shoddeeti Daawitichi shoddo

¹ No Doono Yeero, ne shigo showee toommo bulliich oogichii arichetone; ne galleto damba shimaayoyee beshitone.

² Ne etteenaꞌochi naboona, nichoon kichiya qaawiibeeti ne etteenaꞌon cikkaayoyich gaggereenaꞌonaa xammii beetinaꞌonochi noonoochee, galletoon neech qanniihine.

³ Ne halliti, shimaayoon ta beeggemmona, boonoshi xaaꞌi xaaꞌooch ne kotiiti ageneenaa xojjeneenaꞌonon ta beeggemmona,

⁴ biin ne gabemmoyich asho amoone? Biich ne aaxxiyemmoyich ashi bushoo amoone?

⁵ Giishechoon maraakoyee biin shappiihine; oogoonaa oogee yiiroonochi gubbichoon biich ukiihine.

⁶ Ne kisheenaꞌochi shuunoo bulli toommooch ukkiriihine; bullinoo bi baatee dechiich hajjiihine.

⁷ Bageenaꞌonaa gatteenaꞌonon bulla, kubbi cooxinaꞌon,

⁸ shimaajji gaceenaꞌon, bahareexi haasheenaꞌon, baharee daggoona shiwureebeeto bullin, biich hajjiihine.

⁹ No Doono Yeero, ne shigo showee toommo bulliich, oogichii arichetone.