Shoddo 78 - Kafa Linguistics Project

Yeeri Bi Asheenaꞌoyich Tuniiti Mooyo

Asaafichi shoddo

¹ Ta asheenaꞌote, ta dojjoon ellebote; ta noonoochee kechiibeeti qaaroon waayebote.

² Ta yibbaatoon shaahiyoona wonnemmo taane; wonnee tiijjiꞌi aacheeti mooyon gaxxemmo taane.

³ Ebiyoo, no waayetonaa no ariitonon, no qaabbechinaꞌo nooch gettitoniye.

⁴ Ebinoo no bushiisheenaꞌoyich aachaachemmo noone; Doono Yeeri tuniiti worganikkiti mooyon, bi hakkoonaa gaakkechi shuunoonon woyemmi shiijjeroyich gettemmo noone.

⁵ Biyoo Yaaqobichi shiijjereenaꞌoyich qociyoon neechiye; Israꞌeeleenaꞌoyichoo sheeroon geddiye; no qaabbechinaꞌoo boonoshi bushiisheenaꞌoyich boonoshi dojjemmoyichoo gettiye.

⁶ Ebiyoo gubbi shiijjereenaꞌo ariyemmoyich, boonoshi bushiisheenaꞌoyichoo boonoshi arichiyemmoyichiye.

⁷ Ebina Yeerin gibenemminaꞌone; bi shuuneti shuunoon batteyaachemminaꞌone; bi geteenaꞌonoo quyemminaꞌone.

⁸ Boonoshi qaabbechinaꞌochi shiijjeroochoommon, babbereenaꞌo, hukkechinaꞌo, kaameyaani mullechinaꞌo, Yeerichoo gibeneyaani ayaanechinaꞌo, tuneyaachemminaꞌone.

⁹ Efreemichi bushiisheenaꞌo maꞌoon yechitinaꞌo boonoshi tunetaanoona, koyee aabooba gubb wotteheete.

¹⁰ Yeerina tookkii boonoshi giyiti wogoon quyeyaaneenaꞌone; bi sheeroona hamon qajjiyeete.

¹¹ Boonoshich bi shuuneti shuunoon, bi bekkiiti gaakkechi mooyonoo batteheete.

¹² Boonoshi qaabbechinaꞌo aafoochaa, Gibitsee showoochaa, Tsoꞌaani gaddoochaa, gaakkechi mooyon tuniihe.

¹³ Baharoon bi qoodaa aroona besheheete; aacoo daabboochoommon bi neexemmoyich tuniihe.

¹⁴ Areddoon quboona, xumo bullinoo qaaqqee conjoona boonoshin yaabiye.

¹⁵ Barahoochaa xaqqoon gaakkiye; baharee aacoommi wodde aacon boonoshich immiye.

¹⁶ Xaqqoochee aaco xuupphemmoyich tuniihe; woce aacochoommon bi woccemmoyich tuniihe.

¹⁷ Tunebaani boonoshi axaaxoon daakkii shuunoona beshoon biin xuqqiyeete; barahoochaa Beshoo Yeeri toommooch hukkoon tiijjiyeete.

¹⁸ Boonoshi xiqqeti maayoon echoona boonoshi mulloona Yeerin phireheete.

¹⁹ Ishichiꞌi Yeeri toommooch yibbaateheete: “Yeeri barahoochaa maayoon nooch giddiyoon hakkehe?

²⁰ Xaqqoon bi yexaa aaco keyo, aaco oogichiꞌi ufo iberoone. Tunebaani koshon, bi asho nooch meenon, imon hakkehe?” iyeete.

²¹ Doono Yeeri ebin waayeꞌi oogichii kaarehe; Yaaqobi toommooch qaaqqoo aaxxehe; Israꞌeeli toommooch bi kaaro cufiye.

²² Ebiyoo Yeerin gibeno boonoshi qajjitoyich, bi wodiyoona gibeneyoo boonoshi qajjitoyichiye.

²³ Tunebaani damba beeti gumeenaꞌoyich gettiye; shimaajji kelleenaꞌon qechiye.

²⁴ Boonoshi maayemmoyich mannoon kindiihe; shimaajji maayoon boonoshich immiye.

²⁵ Asho maraakeenaꞌochi koshon maahe; beshii echeti maayoon boonoshich deejjiye.

²⁶ Aabi-keyo waani yongoon shimaayoochaa yongiihe; bi hakkoona deshi-waani yongo yongemmoyich tuniihe.

²⁷ Butto woddoommon wodde meenon, baharee gasheexi qacoommi, yoobbiibeeti dofee kafeenaꞌon kindiihe.

²⁸ Boonoshi kaambee daggooch, boonoshi duukkaanee guudooch, kindiihe.

²⁹ Boonoshiyoo maaꞌi michiyeete; Yeeriyoo boonoshi xiqqeton boonoshich immiye.

³⁰ Tunebaani boonoshi xiqqo kuxeyaan beetaa, maayo boonoshi kookkooch beetaa,

³¹ Yeeri kaaro boonoshi toommooch kindiye; boonoshi daggoochee giidechinaꞌon wuxiye; gaawi gaawe Israꞌeelee gurimaasheenaꞌon ciichiye.

³² Ebi bulli tunetaanoona, axaaxoon shuunoon qayaaneenaꞌone; gaakkechi shuunoon bi shuunetaanona, biin gibeneyaaneenaꞌone.

³³ Ebich boonoshi yemeeno hiinno aalloommon kaate bi aallemmoyich, boonoshi eeno keqqoona bi ciiremmoyich, tuniihe.

³⁴ Boonoshi daggooch qitoon bi geddimmona, bi waan wotteheete; mulloochee tiijjiꞌi bi waan wotteheete.

³⁵ Yeeri boonoshi Deebe Xaqqo bi tunoon, Beshoo Yeeri boonoshin Biishee Wodiyecho bi tunoon, shalligiyeete.

³⁶ Tunebaani boonoshi noonoona biin dawushiyeete; boonoshi heciyoonoo biich koottiyeete.

³⁷ Boonoshi mullo biin gibenoona manjaanoone; bi wogoyichoo gibeneyaaneenaꞌone.

³⁸ Ebi tunetaanoona bi boonoshich ariqqehe; boonoshi axaaxoon maariyani boonoshin aalliyaanoone. Bi kaaroon meeti aaboon shuuchehe; kupphe bi kaaro bullin kindiyaanoone.

³⁹ Kechiichii wotteyaani hiinnoomminaꞌo, meenon taheti asheenaꞌo, boonoshi tunoon shalligiye.

⁴⁰ Meeti aaboon barahoochaa bi toommooch tiyiyeete; barahoochaa biin ayinikkiyeete.

⁴¹ Wochii wochii biin phireheete; Israꞌeelee Yaafoo ippemmoyich tuniiheete.

⁴² Oogeti bi giidoon, etto kishoochee boonoshin bi wodiiti aaboonoo, shalligaaneenaꞌone.

⁴³ Ebiyoo Gibitsaa bi tuniiti malletoon, Tsoꞌaani gaddoochaa bi bekkiiti gaakkechi mooyoniye.

⁴⁴ Boonoshi aacon damoo tuniihe; ebina boonoshi woce aacon uyon hakkaaneenaꞌone.

⁴⁵ Gameenaꞌon bi deejjaa boonoshin qaachiyeete; woqqeqqeenaꞌonoo bi deejjaa boonoshin xuxiiheete.

⁴⁶ Boonoshi maayeenaꞌon hipperoyich, boonoshi goyeenaꞌonoo gechoyich, immiye.

⁴⁷ Boonoshi woyinee qomboon baderoona, boonoshi balaasee mixinaꞌon doshoona, aalliihe.

⁴⁸ Boonoshi miiminaꞌon baderoona, boonoshi bageenaꞌonoo xeeyoona, wuxiye.

⁴⁹ Aalloon deebiibeeti maraakoon deejjiꞌi, naxoona, aalliyoonaa xuuxiyoona, bi kaaree shiixxoon boonoshi toommooch kindiihe.

⁵⁰ Bi kaaroyich gommon qanniihe; qitoocheenoo boonoshin wodiyaanoone; naxoyichoo boonoshin beshiiꞌi immiye.

⁵¹ Gibitsee showoochaa, gutenee bushoo bullin, Kaami duukkaanoochaa, bushittinee giidoona shiijjetinaꞌon, wuxiye.

⁵² Qiddoochoommon bi asheenaꞌo aafooch shiichiye; boonoshin barahoochaa yaabiye.

⁵³ Boonoshin diggoona bi yaabitoyich, shataaneenaꞌone; tunebaani boonoshi etteenaꞌon baharo qooxxiye.

⁵⁴ Bi qanne kishoona koyeꞌi bi yechiti guudooch, yaafeeti bi showooch, boonoshin deebiye.

⁵⁵ Boonoshi aafoochee aageteenaꞌon yookkiye; boonoshi showoonoo iristo tuniiꞌi qoodiye; boonoshi kexonoo Israꞌeeleenaꞌoyich immiye.

⁵⁶ Tunebaani ebi Israꞌeeleenaꞌo Yeerin phireheete; Beshoo Yeeri toommooch hukkoon tiijjiyeete; bi qociyoon quyeyaaneenaꞌone.

⁵⁷ Wotteꞌi boonoshi qaabbechinaꞌochoommon dawushechinaꞌo tuneheete; qungeti shangoochoommon gibeneyaaneenaꞌo tuneheete.

⁵⁸ Geppeexi boonoshi goyinnee xaaꞌoona biin ippiiheete; boonoshi shahalleenaꞌona bi qanaatemmoyich tuniiheete.

⁵⁹ Yeeri ebin waayeꞌi oogichii kaarehe; Israꞌeelinoo ciroona qajjiye.

⁶⁰ Asheenaꞌo daggooch bi kotiiti bi duukkaanoon, Shilooha beeti bi beeyi xaaꞌoon, qajjiye.

⁶¹ Bi giidoonaa oogoonochi malletoon, etteenaꞌo keci daammemmoyich tuniihe.

⁶² Bi iristo tuneti bi asheenaꞌon kaarehe; goraadoyich beshii immiye.

⁶³ Boonoshi gurimaasheenaꞌon qaaqqoo maahe; boonoshi maache bushiisheenaꞌoyich gaaree shoddo shoddeyaanoone.

⁶⁴ Boonoshi qeesheenaꞌo goraadoona qitiyeete; boonoshi xuumeenaꞌo eeppemmon mawiiheete.

⁶⁵ Aroochee Doono Yeeri tokketoochee timoommon tiyiye; woyinee uyoon uchiti giidechi ashi cidoommon ciddiye.

⁶⁶ Bi etteenaꞌon gubb wochii yookkiye; bulli aaboon boonoshi yeellemmoyich tuniihe.

⁶⁷ Yooseefichi duukkaanoon qajjiye; Efreemi yoodoon kaacaanoone.

⁶⁸ Tunebaani Yihudi yoodoon, bi shunniibeeti Tsiyooni guudon, kaacciye.

⁶⁹ Bi yaafee kexon guudoommon tuniiꞌi shuunehe; bulli yemeenoon bi manjiiti showoommon tuniihe.

⁷⁰ Bi guuno Daawitin kaacciye; bagee qiddoochee deebiye.

⁷¹ Bi ashoo Yaaqobich qiddoo, bi iristo Israꞌeelich taatoo bi tunemmoyich, xaachiibeeti bageenaꞌon quyoochee deebiye.

⁷² Kaame mulloona boonoshin quyehe; shalligoonoo boonoshin yaabiye.