Shoddo 77 - Kafa Linguistics Project

Goggoyich Corooteeti Corooto

Shoddechinaꞌochi ukkiroo Yedutuunich, Asaafichi shoddo

¹ Oogichaꞌa Yeer waan cookiyo; ta qolloon bi waayemmoyich, oogichaꞌa Yeer waan cookiyo.

² Ta xuuxee aabooba ta Doonon qaawiyo; xumoonoo ciroona taahaanoon ta kishoon yaggiyo; ta kasheyoo goggemmon mawiihan.

³ Yeerichon gabaꞌa tuummeho; kichaa ta kindiimmona ta mullo qitiye.

⁴ Ta aafo shininneyaachemmoyich bajjehine; oogichaa ta xuuxetoyich, yibbaatemmon mawiiho.

⁵ Besheti yemeenoon gabiyo; wonnee natinaꞌon shalligiyo.

⁶ Kichaa kindiyaabee showoon hariiho; ta mulloona yexiyaabee ishichaꞌa echeho:

⁷ “Doono Yeeri bulli yemeenoon duppehe? Ebiyee bekk ciroona nooch deeyaachehe?

⁸ Bi shoodo bulli yemeenooch aalletone? Bi gibenikkiti gibeno echetone?

⁹ Yeeri, bi maaroon qajjitone? Bi kaaree naboona, bi ariqqo echetone?” iyo.

¹⁰ “Beshoo Yeerichi qanne kishoo noon gaachoon bi qayo taach biiyoon tunehe” iyo.

¹¹ Doono Yeerichi shuunoon shalligemmo taane; wonna bi tuniiti gaakkechi shuunoon shalligemmo taane.

¹² Ne shuunoo bullin kichi kindiyemmo taane; gaakkechi ne shuunoon yexiyemmo taane.

¹³ Yeero, ne gommo bulli yaafoone; no Nuggishoo neenoommi ooge nuggishoo aalloone.

¹⁴ Gaakkechi shuunoon shuunaabeeti Nuggishoo ne baach neene; macceenaꞌo daggooch ne hakkoon bekkiito neene.

¹⁵ Yaaqobinaa Yooseefinochi yareenaꞌo tuneti ne asheenaꞌon, ne mochoona biisheto neene.

¹⁶ Yeero, aacinaꞌo neen beeggiꞌi, aacinaꞌo neen beeggiꞌi shattiyeete; aachi deshi ducheenaꞌoo qeweheete.

¹⁷ Qubeenaꞌo amiyon dichiyeete; gumeenaꞌo xeejjii gigeheete; ne shangee xeeyeenaꞌo bulli xaaꞌoona phaqqiyeete.

¹⁸ Ne gigee qaaro yubee yongee daggoochaa waayeehe; ne xeeyo alemo bulliich phaqqiye; showoo shuuriye; qeweenoo iye.

¹⁹ Ne gommo baharee daggooch beetone; ne kaattoo ooge aachi daggoochiye; tunebaani ne hilloo arooch bekkeyaanoone.

²⁰ Muusinaa Harooninochi kishoona, ne asheenaꞌon bagoochoommon yaabihine.