Shoddo 74 - Kafa Linguistics Project

Wodoo Danemmoyich Corooteeti Corooto

Asaafichi shoddo

¹ Yeero, bulli yemeenoon amoyich noon duppenne? Gaddooch beeti bagoommi ne asho no toommooch ne kaaro amoyich cufiye?

² Wonna ne kaacceti ne iiteenaꞌon, ne biisheti ne iristee yoodee asheenaꞌon, ne beeyi xaaꞌoo ne tuniiti Tsiyooninoo, gabibe.

³ Ne baatoona guudiree, tiishee ciroona aalleton ciine; yaafee kexooch beeti mooyo bullin etto aalliitone.

⁴ Ne etteenaꞌo ne yaafee xaaꞌoochaa goohiyeete; wudee danee malletoon tuniiꞌi, boonoshi baanderoon arooch geddiyeete.

⁵ Boonoshiyoo mixinaꞌon qofiyona kuxxiibeeti, kubbeexi michi qeccechinaꞌon shaahiyeete.

⁶ Daabbeexi shashoon deeccoona, modooshoonoo tiichiyeete.

⁷ Ne yaafee kexon michii aalliiheete; ne shigo ceekketi xaaꞌoon eeꞌiiheete.

⁸ Boonoshi mulloona, “Boonoshin neexi hajjemmo noone” iyeete; showee toommeexi yaafe xaaꞌoo bullin michiyeete.

⁹ Worganikkiti malletoon beego echetone; echeti keemecho aalloone; ebi aati wottoon tune bi beeyemmo gaata, ariibeeto no daggooch aalloone.

¹⁰ Yeero, etteenaꞌo cooqqiremmo aati wottooniye? Bulli yemeenoon ne shigoon naagi beebeeta?

¹¹ Ne kishoon gubb ne wochaabeeto amoyichiye? Ne qanne mochoon tiijjoo ne qajjaabeeto amoyichiye?

¹² Yeero, wonnee tiijjaꞌa ne, no Taatoo neene; showee toommooch wodoon tuniihine.

¹³ Ne hakkoona baharoon qoodihine; baharee daggeexi cooxochi qelloon pharixxehine.

¹⁴ Lewataanichi qelloon pharixxehine; baraheexi cooxinaꞌoyich maayo tuniyaꞌa immehine.

¹⁵ Gishiishi aaconaa tunoona xuupphemmoyich tuniihine; ogooge aaco shuuqqemmoyich tuniihine.

¹⁶ Areddoo neechone; xumoo neechone; aabeenaa ageneenon manjiito neene.

¹⁷ Showoyich daaroon tuniito neene; yooyonaa qaawoonon hallito neene.

¹⁸ Doono Yeero, aabichii etto cooqqiriibeeto gaata, mullaalli asheenaꞌo ne shigoon hoxeebeeto gaatoo, ciine.

¹⁹ Hakka guutoo tuneti ne asheenaꞌon cooxoyich beshii immaahine; girechinaꞌochi kasheen bulli yemeenoon batteyaahine.

²⁰ Manderoo tuneti showee duꞌo bulliich xuꞌo ceennitoyich, noonna tookkaa ne giyeti wogoon gabibe.

²¹ Neexaa hajjeetinaꞌo yeelleree gubb wottaayeete; girechinaꞌonaa amaalli hulleenaꞌona neen galletebeete.

²² Yeero, tibe; ne taggoon taggebe; mullaalleenaꞌo heeyo bullin neen cooqqirii beeton ciine.

²³ Ne etteenaꞌo cookiibeeti cookoon, kuxaanoon boonoshi goohii beeton batteyaahine.