Shoddo 73 - Kafa Linguistics Project

KEEJJINNEE KUXO ( Shoddo 73–89 ) Yeerichi Dayinneto

Asaafichi shoddo

¹ Boonoshi mullo xalloo tuneti Israꞌeeleenaꞌoyich, iberoochaa Yeeri gaawetone.

² Tunebaani ta, ta baatoo tattelleꞌi, giinnii dihoochee giishechoyich wodiyo.

³ Ebiyoo gonde asheenaꞌoyich mooyo kaamoon beegona, ebi geecechi asheenaꞌon ta qanaatetoyichiye.

⁴ Qaakkee ariyaaneenaꞌone; boonoshi ashittino iiwe diggoone.

⁵ Bare asheenaꞌochoommon duꞌeyaacheete; bare asheenaꞌochoommon qaakkeyaacheete.

⁶ Ebich geecoon qetteexi shashoochoommon tifetinaꞌone; xuꞌoonoo tahoochoommon tahetinaꞌone.

⁷ Boonoshi aafo aangiꞌi maach curixehe; gonde mooyo boonoshi mullooch ceennii aphirehe.

⁸ Boonoshiyoo coonee gondoon yibbaateheete; geeciibee bareenaꞌon neexxii hajjoyich miicheheete.

⁹ Shimaayeexi Yeerin gondii yibbaateheete; boonoshi manaashoo showoona tatehe.

¹⁰ Ebich, Yeerichi asheenaꞌolla boonoshi waan wotteheete; boonoshi yibbaatoo bullin iberiiheete.

¹¹ “Halla Beshoo Yeerich ariyoo beete? Yeeri ariyemmo aabichireeshiye?” iyeete.

¹² Gondeenaꞌo illa ebiyoomminaꞌone; boonoshich beemo maggeyaanoone; boonoshi gaanno daakkii daakkii qeyiye.

¹³ Baad cikkii duuboon ta mulloon xalliihoye; ta xallittinoon bekkiyoyich ta kishoon machehoye.

¹⁴ Heeyo bullin xooppehoye; maaddi maaddoona sheereehoye.

¹⁵ Ebiyoommi mooyon ta yibbaatemmo gaata, ne asheenaꞌoyich gibeneyaano tunesho taane.

¹⁶ Ebi mooyon ariyoon qaawiyo; tunebaani taach oogeti maggoon tunehe.

¹⁷ Ebiyoo Yeerich yaafee kexooch ta giyemmi wottooniye. Ta giyetoyee gubb, gondeenaꞌochi ciiro amo gaata ariihoye.

¹⁸ Boonoshin giinniibeeti xaaꞌooch kotiihine; dihi boonoshi aallemmoyich tuniihine.

¹⁹ Aabichiꞌi qillifee yexx bedaan beetaa aalleheete! Boonoshi ciiro keqqichito tunehe.

²⁰ Ta Doonocho, ne tiyiyooba, tokketoochee tiyimmona batteebeeti gumochoommon, aallemminaꞌone.

²¹ Ta kashe caammehooba, ta mullo ayiniyooba,

²² mullaalli dookko tunehoye; ne aafoochaa miimo tunehoye.

²³ Tunebaani ta bulli aaboon neenna tookkaa taane; newoo ta qanne kishoon yechehine.

²⁴ Ne ciicoona taan yaabihine; ciiroochaa, oogoona taan daammemmo neene.

²⁵ Neyee besh shimaayooch taach koni beete? Showoochoo neyee baroo ta qaawemmo aalloone.

²⁶ Ta kashoonaa ta meenona niroon hakkiye; tunebaani Yeeri bulli yemeenoon ta hakkoonaa ta qoodoonane.

²⁷ Ebiyoche neyee wokkii beetinaꞌo aallemminaꞌone; neech gibeneyaaneenaꞌon aalliyemmo neene.

²⁸ Tunebaani Yeer waan giddo taach gaawiye; ne shuunoo bullin miixoyich, ta Nuggishoo Doono Yeeri ne shoobooch giyeto taane.