Shoddo 72 - Kafa Linguistics Project

Taatoyich Corooteeti Corooto

Solomoonichi shoddo

¹ Yeero, taatoo dayinnetoona nallemmoyich, taatoochi bushoo cadiqoona bi qeejjemmoyich, hakkoon imbe.

² Biyoo ne asheenaꞌon tatoona qeejjemmone; xukketi ne asheenaꞌoyichoo tachi nallemmone.

³ Guudinaꞌo gaannoon, geppeenaꞌo cadiqee aafoon ne asheenaꞌoyich daniibeete.

⁴ Taatoo iriteeti asheenaꞌoyich nallibe; girechinaꞌon wodiibe; xuqqii beetinaꞌon aalliibe.

⁵ Aabe beemmi yemeenooch beddaahaa, wotta agene beemmi yemeenooch beddaahaa, shiijjeroochee shiijjerooch beddaahaa, bi beeyemmoyich tuniibe.

⁶ Taatoo, mocoo gacceeti gaddooch dihiibeeti amiyoommon, showoon shuxiibeeti amichi kuchoommon, tunebe.

⁷ Bi yemeenooch cadiqittino gamine; agenee bi kotoochee aallemmi wottoon diggoo woddebe.

⁸ Baharoochee baharooch beddaahaa, Efiraaxisi aacoochee showee tuggooch beddaahaa, qeejjibe.

⁹ Barahooch beetinaꞌo bi aafooch goyinnebeete; bi etteenaꞌoo buttoon baaxeete.

¹⁰ Tarisheshinaa buure showeenaꞌonochi taateenaꞌo biich gibiroon qoceete; Sheebinaa Arabinochi taateenaꞌo wojjoon deebeete.

¹¹ Taateenaꞌo bulli biich goyinnebeete; aagetoo bulli biich maddebe.

¹² Girecho bi waan cookiyooba, wodiyemmone; iriteetonaa gaachemmon muccetonon gaachemmone.

¹³ Hakka guutoonaa girechonoyich ariqqemmone; iriteetinaꞌochi kashoon wodiyemmone.

¹⁴ Boonoshi kasho bi aafoochaa aaxxoo bi tunetoyich, neexaa hajjeyoonaa xuꞌonoochee boonoshin biishemmone.

¹⁵ Taatoo meeti yemeenoon beebe; Sheebee aachoo biich ichebe. Bulli aaboon corooto biich corooteebe; heeyo bullin Yeerichi diiroo biich tunebe.

¹⁶ Showoo bulliich maayo oogichi woddebe; gocheti maayo guudinaꞌo toommoochaa yaaddebe. Libanoosi guudeexi maayoochoommon aafebe; katemooch beetoo gaddeexi mocoochoommon hubbimibe.

¹⁷ Bi shigo bulli yemeenoon manjiree beebe; bi mooyo getteebee aabo yagoommon yagibe. Aagetoo bulli biinna diireebe; aagetoo bulli biin “Diireetone” gete.

¹⁸ Bi ikkeeto baach worganeeti mooyon tuniibeeti, Israꞌeelee Nuggishoo Doono Yeeri diireebe!

¹⁹ Ooge bi shigo bulli yemeenoon diireebe! Bi oogee yiiroo showoo bulliich ceene. Ameena, ameena.

²⁰ Iseyichi bushoo Daawitichi corootee taco ebine.