Shoddo 71 - Kafa Linguistics Project

Geene Ashi Corooto

¹ Doono Yeero, ne shoobooch giyeto taane; ciroona yeellayona.

² Ne cadiqittinoona taan wodiibe; taan shiwebe; ne waamon ta waan gaꞌiibe; taanoo wodiibe;

³ deebe xaqqoon tuneree, manje mishigoonoo tuneree, taan wodiibe; ne ta deebe xaqqo, ta mishigo neene.

⁴ Ta Nuggishoocho, gondoochi kishoochee, xuꞌechonaa mulli manjoonochi kishoochee taan wodiibe.

⁵ Nuggishoo Doono Yeero, ta gibeno neene; ta bushittinoochee tiijjaꞌa neen gibeneto taane.

⁶ Ta shiijjoochee tiijjaꞌa neenna degeehoye; ta indee maacoochee ta shiijjemmoyich tuniito neene; bulli aaboon neen galletoye.

⁷ Meetinaꞌo taan diigitinaꞌone; tunebaani ne, taach manje deebo neene.

⁸ Ne galleto ta noonooch ceennitone; heeyo bullin ne oogoon awaajjemmo taane.

⁹ Ta geenee yemeenooba taan duppaahine; ta giidoo qayiyooboo taan qajjaahine.

¹⁰ Ta etteenaꞌo gondoon ta toommooch yibbaateheete; ta kasheen aalliiya qaawii beetinaꞌo kiceeꞌi koceeheete.

¹¹ Ishichiinoo iyeete: “Yeeri biin qajjitone; biin wodiyemmo aallo bi tunetoyich, yoohi yeshote” iyeete.

¹² Yeero, tayee wokkaahine; ta Nuggishoocho, taan gaachoyich afaafinebe.

¹³ Ta shixechinaꞌo yeellebeete; aallebeete; taach gondoon gabii beetinaꞌo giishebeete; cooneebeete.

¹⁴ Tunebaani ta, bulli aaboon neen gibenemmo taane; beshaa beshoon neen galletemmo taane.

¹⁵ Ta ariyoyee damboo bi tunetaanoona ta noonoo ne cadiqittinoon, ne wodiyoonoo heeyo bullin yibbaatemmone.

¹⁶ Nuggishoo Doono Yeero, waaree, giidechi ne shuunoon awaajjemmo taane; cadiqo ne baach tunoon awaajjemmo taane.

¹⁷ Yeero, ta bushittinoochee tiijjaa taan dojjito neene; tawoo and beddaahaa worganeeti ne shuunoon awaajjaabeeto taane.

¹⁸ Yeero, ne hakkoonaa ne giidoonon, woyemmi shiijjeroyich ta awaajjimmi wottoon, geeneꞌa ta bukketaanona taan duppaahine.

¹⁹ Yeero, ne cadiqittino shimaayooch shagoone; ogooge mooyon tuniito neene; Yeero, neenoommo konine?

²⁰ Meeti xuuxoonaa iritoonon ta beeggemmoyich ne tuniitaanona wochinnoon kasho ta wochemmoyich tuniyemmo neene; showee duchoochee wochinnoon taan kichemmo neene.

²¹ Ta oogoon daakkemmo neene; taan wochinnoon goggiyemmo neene.

²² Ta Nuggishoocho, gibeneeto ne tunetoyich, ooge ximboona neen galletemmo taane. Israꞌeelee Yaafoocho, masinqoona galletee shoddoon neech shoddemmo taane.

²³ Galletee shoddoon shoddebee, neech ililemmo taane; ne wodiiti ta kasheyoo neech ililemmine.

²⁴ Ta iriteyoon qaawitinaꞌo, boonoshi yeelletoyich, cooneetoyichoo, heeyo bullin, ne cadiqittinoon yibbaatemmo taane.