Shoddo 7 - Kafa Linguistics Project

Dayinnetoyich Corooteeti Corooto

Biiniyaamechi Kushichi naboona Doono Yeerich Daawiti shoddeti shoddo

¹ Ta Nuggishoo Doono Yeero, ne shoobooch giyeto taane; taan yookkii beetinaꞌo kishoochee taan shiwe wodiibe;

² ebi tuno qayigaata, daaheroochoommon geechi daamiree, wodiyemmo aalloochaa taan yangixxemminaꞌone.

^3-4 Ta Nuggishoo Doono Yeero, ta kishooch gonde mooyo beegaata, ta xiboyich deꞌee kaalloon gondoon wochito ta tunegaata, naboo aalloon ta ettoon boggeto ta tunegaata, ebin tuniito ta tunegaata,

⁵ ta etto taan yoohi yeshe; taan neexi wuxibe; ta oogoon showoo maanjibe.

⁶ Doono Yeero, ne kaaroona tibe; kaaroona tiyiti ta etteenaꞌo toommooch tibe; tiyiree, dayinnetoona bi nalleyemmoyich tuniibe.

⁷ Macceenaꞌo bulli ne guudoona kiceebeete; boonoshi tookk beechi taatebe.

⁸ Doono Yeeri macceenaꞌo toommooch nallemmone; Doono Yeero, ta cadiqittinoommona taach nallibe; ta xallittinoommona taach nallibe.

⁹ Gaboonaa mulloonon ariyaabeeti cadiqe Nuggishoocho, gonde asheenaꞌon gonde shuunoon shuunoochee baye; tunebaani cadiqeenaꞌo manji neexemmoyich tuniibe.

¹⁰ Mulli kaameenaꞌon wodiibeeti Yeeri, taach gaachoommone.

¹¹ Yeeri dayinnetechi nallechone; gondo toommooch bulli aaboon kaareebeeti Nuggishoone.

¹² Asho gondoochee wottoon bi qayigaata, Yeeri bi goraadoon gayiremmone; bi maꞌoon yeephiree qanniyemmone.

¹³ Wuxiibeeti ginee qiicoon qanniitone; cobbcobbimii aaxxeebeeti shangeenaꞌonoo shuunetone.

¹⁴ Gonde asheenaꞌo, gondoon xifemminaꞌone; maroon yeqqeferee, kootee kooton shiyemminaꞌone.

¹⁵ Ashich oppoon iijjiibeeto, bi iijjiti are oppooch dihemmone.

¹⁶ Bi maroo bi toommooch wottemmone; bi xuꞌo wochi bi shimbooch kindemmone.

¹⁷ Bi cadiqittinoyich Doono Yeerin galletehoye; Beshe Nuggishoo Doono Yeeri shigoyich, galletee shoddoon shoddehoye.