Shoddo 69 - Kafa Linguistics Project

Gaachoon Danoyich Corooteeti Corooto

Shoddechinaꞌochi ukkiroyich, Daawitichi shoddo

¹ Aaco ceennii ta qettooch bi bedditoyich, Yeero, taan wodiibe.

² Neexxi xaaꞌoo aalli taappooch qoocheto taane; aachi gejjooch giyehoye; aachi aayo taan qooxxiye.

³ Cookaabee, cookaabee maraateto taane; ta killoo baggitone; ta Nuggishoon quyoona ta aafeenaꞌo doojjiyeete.

⁴ Naboo aalloon taan shixxii beetinaꞌo, ta qelli eexoyee beshi meetinaꞌone; koote mooyona taan aalliiya ii beeti ta etteenaꞌo meetinaꞌone; ta gaayaani mooyon wochoo taach qaawiihe?

⁵ Yeero, tuushoo ta tunoon ariyaabeeto neene; ta axaaxoo neech aacheeto toonoone.

⁶ Beshe Hakkechi Nuggishoo Doono Yeero, neen gibenee beetinaꞌo ta naboona yeellayeete; Israꞌeelee Nuggishoo Yeero, neen qaawii beetinaꞌo ta naboona cooneyaayeete.

⁷ Ne naboyich naagoon haaꞌiito taane; yeello ta aafoon kaappitone.

⁸ Ta maneenaꞌoyich dallaawoo, ta indee shiyetinaꞌoyichoo shiqqoo, tuneto taane.

⁹ Ne kechi qanaato taan michiye; neen boonoshi naaggiibeeti naago ta toommooch kindiye.

¹⁰ Coomoona kasho shaddeehoye; ebichoo naakkeehoye.

¹¹ Dookoon ta tahehooboo taan cooneheete.

¹² Ta mooyon, addibaabooch kotetinaꞌo yibbaateheete; mashechinaꞌoo shoddeheete.

¹³ Doono Yeero, tunebaani ta, ne shunneti aabooba ne waan corootiyoye. Yeero, ne shoodee woddoona, xiisheeti ne wodiyoona, ta qolloon waayebe.

¹⁴ Taappooch qoocheyoochee taan kichibe; ta etteenaꞌo waanee, aachi gejjooch qoocheyoocheenoo, taan wodiibe.

¹⁵ Ambamboo ta toommona woccemmoyich, aachi gejjo taan qooxxemmoyich, showoo taan qooxxemmoyichoo, tuniyaahine.

¹⁶ Doono Yeero, ne gaawe shoodoona ta qolloon waayebe; wodde ne ariqqoommona ta waan wottebe.

¹⁷ Ne aafoon ne guuno waanee badd wochiyaahine; duꞌee toommooch ta beetoyich, kaateree ta qolloon waayebe.

¹⁸ Ta waan katiniree taan biishebe; ta etteenaꞌo waanee taan wodiibe.

¹⁹ Ta naakkeyoon, ta yeelloonaa cooneyoonon, ne ariibeeto neene; ta etteenaꞌo bulliyoo ne ariyaa beetinaꞌone.

²⁰ Naago ta mulloon buriccitone; ebina ta gibeno tahitone. Taach ariqqemmi ashoon qaawiyoye; tunebaani koniyoona aalloone; taan goggiyemmi ashoon qaawiyoye; tunebaani daneyaanoone.

²¹ Ta maayooch caamoon bacciyeete; ta shachewoyichoo kiikkeroon taach immiyeete.

²² Boonoshi aafooch giddeti madoo boonoshich shaachoo tunebe; boonoshi maayo boonoshi diheechonaa aalleechona tunebe.

²³ Boonoshi ciinaachemmoyich, boonoshi aafo manderebe; boonoshi shimetoo bulli aaboon qewebe.

²⁴ Ne kaaree shiixxoon boonoshi toommooch kindiibe; kupphe ne kaaro boonoshi toommooch shage.

²⁵ Boonoshi kaambo shokko echebe; boonoshi duukkaanooch koniyoona beeyaaye.

²⁶ Ebiyoo ne naxeti asheenaꞌon boonoshi duꞌitoyich, ne mayiitinaꞌonoo daakkiꞌi boonoshi shooddiitoyichiye.

²⁷ Boonoshi xuꞌo bullin galli bekkiibe; boonoshin maariyaahine.

²⁸ Boonoshi shigo kashechinaꞌochi mazigaboochee hideebe; cadiqeenaꞌona tookki kobereyaayeete.

²⁹ Tunebaani ta, xuuxoonaa duꞌonoochiye ta beeto; Yeero, ne taan wodiibe; taan quyebe.

³⁰ Yeerichi shigoon shoddoona galletemmo taane; galletoona biin oogiyemmo taane.

³¹ Gattoon woyee qarechi, shanekkechi maaꞌoon deejjoyee beshoon, ebi, Doono Yeerin emirikkiye.

³² Xukketinaꞌo ebin beegiree emiremminaꞌone; Yeerich qeyitinaꞌote, ittoshi mullo goggebe.

³³ Ebiyoo Doono Yeeri iriteetinaꞌochi cookoon bi waayee beetoyich, cuyooch beeti bi asheenaꞌon hoxeyaano bi tunetoyichiye.

³⁴ Shimaayoonaa showoona baharoonaa arooch shaꞌeebeeti mooyo bullina Yeerin galletebe.

³⁵ Ebiyoo, Yeeri Tsiyoonin wodiyemmo bi tunetoyich, Yihudee katemeenaꞌon wochi shuunemmo bi tunetoyichiye. Bi asheenaꞌoo arooch kotemminaꞌone; showoonoo hajjemminaꞌone.

³⁶ Bi guuninaꞌochi yareenaꞌoo woraashemminaꞌone; biin shunnii beetinaꞌo arooch kotemminaꞌone.