Shoddo 68 - Kafa Linguistics Project

Wudoon Danee Shoddo

Shoddechinaꞌochi ukkiroyich, Daawiti shoddeti galletee shoddo

¹ Yeeri tibe; bi etteenaꞌo shacebeete; biin shixxii beetinaꞌo bi aafoochee woci aallebeete.

² Cufoo naayii aalloommon naayibeete; gippoo qaaqqoona wocoommon, gondeenaꞌo Yeeri aafoochee woci aallebeete.

³ Tunebaani cadiqeenaꞌo emiribeete; Yeeri aafoochaa emiroona wucwuceete; oogichishoo emiribeete.

⁴ Yeerich shoddebote; galletee shoddoon bi shigoyich shoddebote; qubee toommona hammii beetoyich, gommon qanniibote; bi shigo Doono Yeerine; bi aafoochaa emiribote.

⁵ Yaafeeti bi xaaꞌooch beeti Yeeri, nihaalleenaꞌoyich nihoone; xuumeenaꞌoyich shaxoone.

⁶ Yeeri shiqqoon shiishecho tuniyemmone; qoppeenaꞌo biicheree emiroona boonoshi beeyemmoyich tuniyemmone; tunebaani hukkechinaꞌo michiibeeti barahooch beeyemminaꞌone.

⁷ Yeero, ne asheenaꞌo aafooch ne shiichiyooba, barahoona ne qaxiriyooba,

⁸ Siini Nuggishoo Yeeri aafooch, Israꞌeelee Nuggishoo Yeeri aafooch, showee shuuriyan; shimaayeenaꞌoo amiyon dudiiheete.

⁹ Yeero, amiyo gaawichiree bi dihemmoyich tuniihine; shuuqqiti ne showoon shuxiihine.

¹⁰ Ne asheenaꞌo aroon beeyi xaaꞌoo tuniiheete; Yeero, ne gaannoochee girechinaꞌoyich immehine.

¹¹ Doono getoon beshiihe; dofee asheenaꞌo bi getoon ishichiꞌi awaajjiyeete:

¹² “Taateenaꞌonaa boonoshi ginee naayinaꞌona wocee aalleheete; mag echeti maacheenaꞌo kecoon qoodeeheete.

¹³ Bageenaꞌo dogooch echetinaꞌolla, boonoshi qoshoo birewoona nasheeti, wacciibeeti aachoochee shuuneeti wullechi, mocere uggeenaꞌon daneheete” iyeete.

¹⁴ Beshe Hakkechi Yeeri areexi taateenaꞌon shaciyooba, baderoo Tsalimooni guudi toommooch kindiye.

¹⁵ Hakkechi guudo, Bashaani guudoocho, meeti cullullechi guudo, Bashaani guudoocho,

¹⁶ meeti cullullechi guudinaꞌote, Yeeri beeya kaacciti guudon, qanaatoona ittoshi ciinniibeeto amoyichiye? Ebi arooch Doono Yeeri bulli yemeenoon beeyemmone.

¹⁷ Doono Yeeri bi mattiqutte gaarinaꞌona Siinee, bi yaafee kexooch waahe.

¹⁸ Damba ne keyiyooba, neenna tookkii kecoon daammehine; hukkechinaꞌo waaneenolla echiyaanoon asheenaꞌo waanee wojjoon deqqehine; Nuggishoo Doono Yeeri ne, arooch beeyemmo neene.

¹⁹ Qemi qemona no shaagoon shaaggiibeeti, Doono galleteebe; Nuggishoo noon wodiyechone.

²⁰ No Nuggishoo wodiyechi Nuggishoone; qitoochee no muriccemmoyich tuniibeeto, Nuggishoo Doono Yeerine.

²¹ Tunebaani Yeeri bi etteenaꞌochi qelloon, axaaxee gommoochee wotteyaache ii beetinaꞌochi gijjechi qelloon, kophemmone.

²² Doono ishichii beetone: “Ne etteenaꞌon Bashaanee deebemmo taane; boonoshin baharee hoonoochee deebemmo taane.

²³ Ne boonoshi damoon neexiree beshemmo neene; ne kunaaneenaꞌoo boonoshi qoodoon danemminaꞌone” ii beetone.

²⁴ Yeero, deenaa ne hamo, ta Nuggishoo, ta Taatoo ne, yaafee kexooch deenaa ne hamo, bekkehe.

²⁵ Shoddechinaꞌo aaf, shoddee qiicoon kaachii beetinaꞌo gubb, kamboon yexxiibeeti maache bushiisheenaꞌo dagg, beetinaꞌone.

²⁶ Boonoshiyoo, “Ooge iitee daggoochaa Yeerin galletebote; Israꞌeelichi shiijjereenaꞌote, Doono Yeerin galletebote” gettemminaꞌone.

²⁷ Haddoona giishecho tuneti Biiniyaami yoodo shiichiye; arooch Yihudee iraasheenaꞌo, Zebulooninaa Nifitaalinochi iraasheenaꞌoo beetinaꞌone.

²⁸ Yeero, ne giidoon bekkiibe; Yeero, wonna noocha iyaꞌa ne bekkiitoommi ne giidoon bekkiibe.

²⁹ Yerusaalem beeti ne yaafee kexoyicha getiree, taateenaꞌo wojjoon neech deebemminaꞌone.

³⁰ Kohee daggooch beeti cooxoommi showoon noggebe; maaminaꞌonaa gubbeneenaꞌonon shaahiibeeti taatee showeenaꞌon, noggebe. Bulliyona yitiree boonoshi birewoon neech boonoshi giddiyemmoyich tuniibe; koyoona emiriibeeti macceenaꞌon shace.

³¹ Iraasheenaꞌo Gibitsee woyemminaꞌone; Topphiyee bi kishoon Yeer waan yaggemmine.

³² Showee toommeexi taatee showeenaꞌote, Yeerich shoddebote; Doonoyich galletee shoddoon shoddebote.

³³ Wonnee wonneecho tuneti shimaayee toommona hammii beetoyich, ooge qaaroona gigee beetoyich, shoddebote.

³⁴ Bi oogee yiiroo Israꞌeeleenaꞌo toommooch, bi hakkoo qubee toommooch tuneti, Yeerichi hakkoon awaajjibote.

³⁵ Israꞌeelee Nuggishoo bi yaafee kexoochaa oogichii shattii beetone; hakkoonaa giidoonon bi asheenaꞌoyich immii beetone. Yeeri galleteebe!