Shoddo 66 - Kafa Linguistics Project

Yeerin Naadiꞌi Galletoona Shoddo

Shoddechinaꞌochi ukkiroyich shoddeeti galletee shoddo

¹ Showooch beetinaꞌote, ittoshi bulli Yeerich ililibote.

² Bi shigoon oogiyoona shoddebote; ooge galletoon biich imbote.

³ Yeerin “Ne shuunoo am shaahoon worganikkitone! Ne hakkoo oogeto bi tunetoyich, ne etteenaꞌo ne aafooch waagwaagiyemminaꞌone.

⁴ Showee toommooch beetinaꞌo bulli neech goyinneheete; galletee shoddoon neech shoddeheete; ne shigoyichoo shoddemminaꞌone” getote.

⁵ Yeeri tuniiton waaree beegote; asheenaꞌo daggooch worganeeti bi shuunoo shattiitone.

⁶ Baharoon shuuꞌi showoon tuniihe; aacon baatoona kimmiyeete; nowoo ebi bi tuniitona emiriyone.

⁷ Bi hakkoona bulli yemeenoon qeejjemmone; bi aafo aageteenaꞌon ciinnii beetone; hukkechinaꞌo geecoona bi toommooch tiyaayeete.

⁸ Macceenaꞌote, no Nuggishoon galletebote; qaaroon waayiiree biin galletebote.

⁹ Bi, kashoona no beeyemmoyich tuniitone; no baatoonoo giinnii dihoochee quyetone.

¹⁰ Yeero, birewoon qaaqqoona wociyoommon, noon wociyaa beeggehine.

¹¹ Dabbooch no yecheyemmoyich tuniihine; no gubboochoo maggoon minjihine.

¹² Asheenaꞌo noon neexxemmoyich tuniihine; qaaqqee daggoonaa aaconochi daggoona beshehone; tunebaani and gaannee xaaꞌooch noon deebehine.

¹³ Micciibeeti deejjoon yeshiree ne kexooch woyemmo taane; ta tiikkeshoonoo ceechemmo taane.

¹⁴ Ebiyoo, xuuxee aabooba ta giyeti, ta noonoochee kechiti tiikkeshoone.

¹⁵ Micciibeeti deejjoyich, awuyi gijjeenaꞌon deejjemmo taane; bagee baaddoon gaawe cinnechi deejjoon tuniiree, deejjemmo taane; gubbeneenaꞌonaa emmisheenaꞌonon deejjemmo taane.

¹⁶ Yeerin shattii beetinaꞌote, ittoshi bulli waaree waayebote; Yeeri taach tuniiton gettemmo taane.

¹⁷ Qaaroon oogichaꞌa bi waan cookiyoye; ta noonoonoo biin galletehoye.

¹⁸ Axaaxoon ta mullooch ta aachito gaata, Doono Yeeri ta corootoon waayeyaacheshone.

¹⁹ Tunebaani iberoochaa Yeeri taachon waayetone; ta cookoon ellee waayetone.

²⁰ Ta corootoon hoxo bi qajjitoyich, bi shoodoon ta waanee wokkiyoo bi qajjitoyich, Yeeri galleteebe!