Shoddo 65 - Kafa Linguistics Project

Oogoonaa Galletoonon Yeerich Giddiyoo

Shoddechinaꞌochi ukkiroyich, Daawitichi galletee shoddo

¹ Yeero, Tsiyoonaa galletoon neech giddiyoo, neech no mookketon ceechoo, nooch qaawiihe.

² Corootoon waayaa beetocho, meeno taheto bulli ne waan woyemmone.

³ Axaaxoo noon qooxiyooba, ne, no xuꞌo bullin maarihine.

⁴ Ne kaacceti asho, ne addibaabooch bi beeyemmoyich, ne waan ne katichiti asho, diireetone. Nowoo ne kexeexi gaawe mooyona, ne yaafee kexeexona michemmo noone.

⁵ Yeeri noon Wodiyechocho, worganikkiti cadiqe mooyon tuniyoona no corootoon waayehine. Showee tuggooch beddaahaa, wohooch beeti baharooch beddaahaa, beetinaꞌoyich gibeno neene.

⁶ Ne giidoona guudinaꞌon manjiito neene; hakkoonoo ginee qiicoochoommon cuyeto neene.

⁷ Ne, baharee goohoon, aachi aayi buugoon, macceenaꞌochi dulloon cikkaayihine.

⁸ Wohi showooch beetinaꞌo, worganikkiti ne mooyona shattemminaꞌone; ne shuunee naboona, aabi-keyoochee aabi-gimooch beddaahaa ililoo waayeyemmone.

⁹ Amiyon dichoona showeyich aaxxiyaabeeto ne tunoon bekkiihine; oogeton bi gaannemmoyich tuniihine; Doono Yeero, showee maayoon bi immemmoyich tuniyoyich, aacinaꞌo shappii ariyaaneenaꞌone; ebiyoommo bi tunemmoyich tuniihine.

¹⁰ Gocheti showoyich, bedditi amiyon dichihine; keyaa giyoonoo tachihine; showoonoo amichi kuchoona shuxiihiine; colleenaꞌonoo diirihine.

¹¹ Ne deꞌittinoona, wodde maayoon qeccehone; ne beshaabeeti xaaꞌoochee diiroo ufee beetone;

¹² Baraheexi miinji gaddo cammiye; geppeenaꞌoo emiroon taheheete.

¹³ Gaddeenaꞌooch bageenaꞌo ceenniyeete; bambeenaꞌoo maayo ceennitinaꞌo tuneheete; boonoshi bulliyoo ililiibee shoddeheete.