Shoddo 64 - Kafa Linguistics Project

Shoobbi Corooto

Shoddechinaꞌochi ukkiroyich, Daawitichi shoddo

¹ Yeero, iriteyaꞌa ta corootaabeeti corootoon waayebe; ettoochi miichoochee ta kasheen wodiibe.

² Gondeenaꞌo aashoona koceyoochee, gonde shuunechinaꞌochi dulloochee taan aachibe.

³ Boonoshi heciyoon goraadoochoommon aciiheete; boonoshi yibbaatoon xuppattechi shangoochoommon awureheete.

⁴ Ottii quyeꞌi xalle ashoon kochiyeete; diqqoona shataanoonoo biin kochiyeete.

⁵ Gonde mooyon tuniiya boonoshinaa boonoshina koceeheete; aashoona olloon olloyich yibbaateheete. “Noon koniyoona beeggaache” ii gabiyeete.

⁶ Gonde gaboon gabiꞌi, “Maroona koceyaꞌa maacceto noone” iyeete; ashi gaboonaa mulloona marechone.

⁷ Tunebaani Yeeri bi shangoona boonoshin kochemmone; boonoshiyoo diqqoona mayemminaꞌone.

⁸ Boonoshi yibbaatoochee tiyitona aalloon boonoshi toommooch deebemmone; boonoshin beegimmo bulli qelloon qeeqqeriyemmone.

⁹ Aroochee asheenaꞌo bulli shattemminaꞌone; Yeerichi shuunoon awaajjemminaꞌone; bi tuniiti mooyonoo yexiyemminaꞌone.

¹⁰ Cadiqeenaꞌo Doono Yeerina emiribeete; bi shooboochoo gibeete; mulli kaameenaꞌo bulli biin galletebeete.