Shoddo 60 - Kafa Linguistics Project

Yeeri Gaachemmoyich Corooteeti Corooto

Daawiti Araam Naharaaminaa Araam Tsobaahina bi koyehooba, Yoꞌaabi aroochee wotteebee Kiikki bamboochaa aaraa gutte hume Edoomeenaꞌon bi wuxiyooba, dojjoyich, shoddechinaꞌochi ukkiroyich, Daawitichi shoddo

¹ Yeero, noon duppetine; noon tiichetine; noon kaareto neene; noon wochiree wodiibe.

² Showoon shuurikkaꞌa gaakketine; showoo tiishetoyich ebi bi gaahoon wochi yeshiibe.

³ Ne, asheenaꞌon xuuxo bekkiitine; dadeddiibeeti woyinee uyoon no uchemmoyich immetine.

⁴ Maꞌoochee boonoshi muriccemmoyich, neen shattii beetinaꞌoyich malletoon bekkiitine.

⁵ Ne shunnaabeeti asheenaꞌo wodemmoyich, ne qanne mochoona nooch wudoon daniibe; no corootoon waayebe.

⁶ Yeeri bi yaafee kexoochaa ishichiye: “Emiroona Shekeemin qeellemmo taane; Sukooti bamboon qoodemmo taane.

⁷ Gilaadi taachone; Minaasi taachone; Efreemi ta xuuree ukoone; Yihudi ta taatee gumboone.

⁸ Moꞌabi ta aachi machee qiicoone; Edoomi taacho bi tunoon bekkiyoyich, ta caammoon duppemmo taane; Filsixeemi toommooch wudee danoona ililemmo taane” iye.

⁹ Mishigechi katemooch koni taan daamba? Edoom koni taan dabbii hamba?

¹⁰ Yeero, noon duppeto neene; Yeero, no ginee naayinaꞌona tookkaa keyaano neene.

¹¹ Ashi gaachoo duuboone; no etteenaꞌon no kochemmoyich, ne noon gaachebe.

¹² Yeerina wudoon danemmo noone; biyoo no etteenaꞌon dech kotemmone.