Shoddo 59 - Kafa Linguistics Project

Yeerina Quyeyoyich Corooteeti Corooto

Daawitin wuxoyich bi kexon giishiree boonoshi quyemmoyich asheenaꞌon Saaꞌooli daachiihooba, shoddechinaꞌochi ukkiroyich, Daawitichi shoddo

¹ Ta Nuggishoocho, ta etteenaꞌo waanee taan wodiibe; ta toommooch tiyii beetinaꞌo waanee taan quyebe.

² Gondoon shuunee beetinaꞌo waanee taan wodiibe; damee ukkechinaꞌo waanee taan wodiibe.

³ Ebiyoche taan wuxoyich ottii quyetinaꞌone; Doono Yeero, gondoon tuneba axaaxoon amoonolla ta shuuneyaanoon, maacmanjeenaꞌo ta toommooch tiyiyeete.

⁴ Ame xuꞌolla ta waan aalloon, taan aalliiya qanniꞌi tiyiyeete; ebin beegiree, taan gaachoyich tibe.

⁵ Beshe Mawe Nuggishoo Doono Yeero, ne, Israꞌeelee Nuggishoo neene; aageteenaꞌo bullin sheeroyich tibe; dawushoona gondoon shuunee beetinaꞌon maariyaahine.

⁶ Showoo xumemmona katemooch wotteꞌi, kunaanoochoommon aacciibee guuddiyeete.

⁷ Boonoshi noonoochee kechii beeton ciine; boonoshi heciyoo goraadoommone; boonoshiyoo, “No yibbaatoon waayeebeeto aalloone” iyeete.

⁸ Tunebaani Doono Yeero, ne boonoshin miiccemmo neene; aagetoo bullin coonemmo neene.

⁹ Ta Giidoocho, neen gibenoona quyemmo taane; Yeero, ne ta mishigo neene.

¹⁰ Ta Nuggishoo bi shoodoona taanna danemmone; Yeeri ta etteenaꞌochi dihoon taach bekkiyemmone.

¹¹ No Doono no gaachoocho, ta asheenaꞌo batteyaachemmoyich, boonoshin wuxiyaahine; ne giidoona boonoshin shace; boonoshin giishiibe.

¹² Boonoshi nooneexi axaaxoyich, boonoshi eciyeexi yibbaatoyich, boonoshi uppii beetonaa koottii beetonoyich, boonoshi geecoona yechebeete.

¹³ Ne kaaree shiixxoona boonoshin aalliibe; ciroona boonoshin aalliibe. Ebina Yeeri Israꞌeelin qeejjiibeeto bi tuno, bi taatittino showee toommo bulliich bedo bi tuno, asho bullich arichemmone.

¹⁴ Showoo xumemmona katemooch wotteꞌi, kunaanoochoommon aacciibee guuddiyeete.

¹⁵ Maayoon danoyich qaawilliyeete; boonoshi qaawiton dano boonoshi qayigaata, aacciyeete.

¹⁶ Ta xuuxee aabooba taach deeboonaa mishigoonon ne tunetoyich, ne hakkoyich shoddemmo taane; qaaroon oogichiree maaddoona, ne shoodoyich, shoddemmo taane.

¹⁷ Yeero, ne, ta mishigo ne tunetoyich, ne shoodoon bekkiyaabeeti Nuggishoo ne tunetoyich, ta Giidoocho, galletee shoddoon neech shoddemmo taane.