Shoddo 58 - Kafa Linguistics Project

Yeeri Gonde Asheenaꞌon Sheeremmoyich Corooteeti Corooto

Shoddechinaꞌochi ukkiroyich, Daawitichi shoddo

¹ Giidechinaꞌote, dayinnetoona nallii ariihote? Asheenaꞌo daggooch tachii nallii ariihote?

² Ariyaachote; ittoshi mulloona gonde mooyon gabiyote; ittoshi kishoona xuꞌoon showee toommooch tuniihote.

³ Gondeenaꞌo shiijjeyaan bee muricciyeete; boonoshi shiijjoochee tiijjiinoo muriccii koottiyeete.

⁴ Boonoshi, dingeree xuppattoommi xuppattechinaꞌone; ulle xekerechoommon boonoshi waamon dookkiyeete.

⁵ Xekeree bi waamon bi dookkaabeeto, kaayechinaꞌonaa qaaxechinaꞌonochi qaaroon waayee qayoyichiye.

⁶ Yeero, boonoshi gashoon boonoshi kookkoochaa tiishe; Doono Yeero, ebi daahereenaꞌochi gammon holliibe.

⁷ Woce aaco beshoommon beshe aallebeete; maꞌoon boonoshi geechimmona boonoshi shango duce.

⁸ Hammiibee muujjiibeeti gengexxoon shaahibeete; bi indee maacaa qicceꞌi shiijjeti, aaboon beeggii ariyaani bushoon shaahibeete.

⁹ Angixo qaaqqooch gedaa distoon bi gaamiyoyee shiichiree, boonoshi bullin afaafinoona hidiree aalliibe.

¹⁰ Gondeenaꞌo toommooch nichoo kicheetaa beegiree, cadiqe asho emiremmone; gondeenaꞌochi damoona bi baatoon machemmone.

¹¹ Ebiyooba asheenaꞌo “Iberoochaa cadiqe ashich bi shuunee gatiyoo beetone; showee toommooch nallechi Nuggishoo beetone” gettemminaꞌone.