Shoddo 55 - Kafa Linguistics Project

Bi Xiboo Biin Beshii Immiti Ashi Corooto

Ooge ximboona shoddechinaꞌochi ukkiroyich, Daawitichi shoddo

¹ Yeero, ta corootoon waayebe; ta qolloon cikki qajjaahine.

² Waayeree taan gaachebe; ta, xuuxoona yexxaꞌa duꞌeto taane.

³ Ta etteenaꞌochi cookoona shatteto taane; gondeenaꞌochi neexxii hajjoona tiisheto taane; ta toommooch xuuxoon deebiyeete; taan kaaree taach etto tunetinaꞌone.

⁴ Ta mullo ta maacaa xuuxehe; qitee keqqoo taan yechiye.

⁵ Shatonaa qewoona ta toommooch waahe; oogichaa shattoye.

⁶ Tawoo, “Uggechoommon qoshoo taach beeto gaata, yoobi hamiree kashesho taane.

⁷ Wohooch yoobi hamiree, barahoochoo beeyesho taane.

⁸ Yuboonaa yuppuppoonoochee wociree, ta wodemmi kexon danesho taane” iyoye.

⁹ Ta Doonocho, xuꞌoonaa hukkoonon katemoochee ta beeggetoyich, gondeenaꞌochi gaboon shace; boonoshi yibbaatoon yeshiyaahine.

¹⁰ Xumoonaa areddoonon ebi katemee uxeree toommona guuddiyeete; dawushoonaa gonde mooyona bi daggooch beetone.

¹¹ Bi daggooch aallo beetone; xuꞌoonaa dawushoona bi addibaaboochee kuxeyaanoone.

¹² Taan naaggiibeeto etto tuneto gaata, haaꞌiyesho taane; ta toommooch geeciibeeto ta taggecho tuneto gaata, bi waanee aashesho taane.

¹³ Tunebaani ebin tuniibeeti ne, taanna tato, ta nuuchoonaa ta xiboona tuneti neene.

¹⁴ Yeerichi yaafee kexooch asheenaꞌona tookkaa hammaabee, shaawi yibbaatoona emiraa beehone.

¹⁵ Gonde mooyo boonoshi daggooch, boonoshi kexoochoo bi beetoyich, qitoo boonoshich shage; kashoona beechi maash hambeete.

¹⁶ Tunebaani ta, Yeer waan cookemmo taane; Doono Yeeriyoo taan wodiyemmone.

¹⁷ Maaddoonaa womikkoonon, aabe tukkehaanoo, gaashillaa cookaabeeto taane; biyoo ta qaaroon waayemmone.

¹⁸ Ta toommooch tiyii beetinaꞌo meettitaanona, boonoshina tookkaa ta koyaabeeti koyoochee, taan shiweree diggoona wochi deebemmone.

¹⁹ Yeer waan wotteyaaneenaꞌo, biinoo shataaneenaꞌo boonoshi tunetoyich, bulli aabooch bi taatee qeenooch beeti Yeeri, ebin waayeree boonoshin cooniyemmone.

²⁰ Ta nuuchoo bi xibeenaꞌo toommooch bi kishoon tiijjiye; bi giyiti wogoonoo happiye.

²¹ Bi yibbaatoo qefoyee beshe aniꞌoone; tunebaani bi gabiibeeto koyooniye; bi qaareenaꞌo zayitoyee beshe nireenaꞌone; tunebaani kaacheti goraadoomminaꞌone.

²² Neen maggeti mooyon Doono Yeeri toommooch dufe; bi neen deggemmone; bi, cadiqe asho dihemmoyich tuniyaachemmone.

²³ Tunebaani Yeero, gondeenaꞌon maash daachiyemmo neene; ashi kashee kichechinaꞌonaa dachechinaꞌona boonoshi eeni qatonolla beetaachemminaꞌone. Tunebaani ta, neen gibenehoye.