Shoddo 51 - Kafa Linguistics Project

Maaroon Danoyich Corooteeti Corooto

Daawiti Baarshabina tookkii shunoon bi maatoyee gubb, Naataani bi waan waahooba shoddechinaꞌochi ukkiroyich, Daawitichi shoddo.

¹ Yeero, ne shoodoommona taan maaribe; ne ariqqee woddoommona ta axaaxoon hidi aalliibe.

² Ta gondo bullin maye; ta axaaxoochee taan xalliibe.

³ Gondeto ta tunoon ariyaabeeto taane; ta axaaxoo bulli aaboon ta aafooch beetone.

⁴ Ta xuqqeto neen, halla neen baachiye; ne aafoochaa gonde mooyon tuniihoye; ebich gondeto ta tunoon ne getonaa ta toommooch ne nalloona tatoone.

⁵ Ta shiijjoochee tiijjaꞌa gondeto taane; ta indee maacooch ta xifeetoochee tiijjaꞌa axaaxecho taane.

⁶ Ne, iberoon ne shunnaa beetoyich, mullecho tunoon taach dojjibe.

⁷ Hisoophee michi waamona ta toommooch wucibe; tawoo xallemmo taane; taan maye; tawoo baderoyee beshoon naccemmo taane.

⁸ Ta emiremmonaa emiroona wucwuccemmonoyich tuniibe; ne tiicheti ta shaawusheenaꞌo emiremmoyich tuniibe.

⁹ Ta axaaxoochee ne aafoon wochibe; ta xuꞌo bullin hidi aalliibe.

¹⁰ Yeero, xalle mulloon taach hallibe; andiroonaa kaamoona tuneti ayaanoon taach imbe.

¹¹ Ne aafoochee taan wokkiyaahine; ne Yaafe Ayaanoon ta waanee daammaahine.

¹² Taan ne wodiihooba ne emirikkoommon, andoo taan emirikkibe; neech deꞌa ii beeti ayaanoon taach imbe.

¹³ Tawoo ne gommon axaaxechinaꞌoyich dojjemmo taane; axaaxechinaꞌoo ne waan wottemminaꞌone.

¹⁴ Taan Wodiyechi Nuggishoo Yeero, damee ukkee gondoochee taan wodiibe. Taan ne wodiyoon ta qaaroon oogichiree shoddemmo taane.

¹⁵ Ta Doonocho, ta noonoon gaxxibe; ta noonoo ne galletoon awaajjemmone.

¹⁶ Deejjoo neen emirikkaachani deejjesho taane; micciibeeti deejjoo neen emirikkaache.

¹⁷ Yeeri deqqemmi deejjoo tiisheti ayaanoone; Yeero, ne, tiishee giisheti mulloon hoxeyaachine.

¹⁸ Ne daaggoona Tsiyoonich gaawe mooyon tuniibe; Yerusaalemi xaqqee uxeroon wochinnoon uxerebe.

¹⁹ Ebiyooba, tate deejjoo, micciibeeti deejjoo, amolla echeyaanoon micciibeeti deejjoo, neen emirikkemmone; ebiyooba gubbeneenaꞌo ne deejjee gudooch deejjeyemminaꞌone.