Shoddo 50 - Kafa Linguistics Project

Yeerin Emirikkiibeeti Mooyo

Asaafichi shoddo

¹ Giidechi Nuggishoo Doono Yeeri gettiye. Aabi keyoochee aabi gimmooch beddaahaa ashoon ceeggiye.

² Oogeti malletechi Tsiyooni katemoochaa Yeeri aaxxee bekkehe.

³ No Nuggishoo woyemmone; cikki qayaachemmone; michiibeeti qaaqqoo bi aafooch beetone; giidechi yuboo bi guudoona beetone.

⁴ Bi asheenaꞌo toommooch nalloyich, showoonaa shimaayoonon miixoo ceeggiꞌi ishichiye:

⁵ “Deejjoona taanna tookkii wogoon giyiti, gibeneeti ta asheenaꞌon taach kicibote” iye.

⁶ Yeeri bi qelloona nallecho bi tunetoyich, shimaayeenaꞌo bi cadiqoon awaajjiyeete.

⁷ “Ta ashoocho, waayebe; ta neech getona; Israꞌeelo, ne toommooch miixebona; ta, ne Nuggishoo Yeeri taane.

⁸ Ne deejjoyich neen ittibateyaache; micciibeeti ne deejjoo bulli aabooch ta aafooch beetone.

⁹ Ne maggoochee gubbenoon, ne dogoochee emmishee baaddeenaꞌon, deꞌon qaawaache.

¹⁰ Kubbooch beeti cooxo bulli, hume geppeenaꞌooch beeti gijjeenaꞌoo, taachinaꞌone.

¹¹ Guudinaꞌooch beeti kafeenaꞌo bullin ariibeeto taane; gaddooch beeti halloo bulli taachone.

¹² “Alemoonaa arooch beeto bullina taacho bi tunetoyich, taan bi shaacii gaatoona neech getaache.

¹³ Gubbenoochi meenon maayehote? Emmisheenaꞌochi damoon uchehote?

¹⁴ Galletee deejjoon Yeerich giddiibe; Beshoo Yeerich ne tiikkeshoon imbe.

¹⁵ Ne xuuxee aabooba taan ceege; ta neen wodiyemmo taane; newoo taach oogoon immemmo neene” iye.

¹⁶ Tunebaani axaaxechoyich Yeeri ishichiye: “Ta sheeroon yibbaatoyich, ta wogee qaaroon ne noonoona getoyich aalloo (gooroo) neech aalloone.

¹⁷ Kaaraa ta ciicaa shixxehine; ta qaaroon gubb duppehine.

¹⁸ Gaayoon ne beegigaata, biinna xibehine; yahechinaꞌona tookkaanoo guuphihine.

¹⁹ Ne noonoon gondoon bi yibbaatemmoyich gawukkihine; ne yibbaatoo ashoon dawushoo tunehe.

²⁰ Kotaachaa ne manoon gondiihine; ne indee bushoonoo oonnehine.

²¹ Ebi bullin ne tuniitaa cikkaa ta qajjetoyich, taan neenna shaahiyaꞌa gabihine. And illa neen kaaremmo taane; ne aafoochaa neen ittibatemmo taane.

²² “Ebich Yeerin batteebeeti ittoshi bulli ebin shalligibote; ebi tuno qayigaata, ittoshin aalliyemmo taane; ittoshin wodiyemmo aalloone.

²³ Galletee deejjoon deejjiibeeto taan oogiihe; bi gommon kaachii beetoyich, ta wodiyoon bekkiyemmo taane” iye.