Shoddo 5 - Kafa Linguistics Project

Gaachoo Danoyich Corooteeti Corooto

Shoddechinaꞌochi ukkiroyich, shumburoona shoddeebeeti Daawitichi shoddo

¹ Doono Yeero, ta qaaroon waayebe; ta gaashiron ellebe.

² Ta Taatoo, ta Nuggishoocho, ne waan ta corootaa beetoyich, ta cookee qaaroon waayebe.

³ Doono Yeero, maaddoona ta qaaroon waayehine; maaddoona ta qolloon ne waan giddiyaachaa, quyaa beehoye.

⁴ Ne, gondoona emiraabeeti Nuggishoo toono neene; axaaxoo neenna tookkii beetaache.

⁵ Geecechinaꞌo ne aafooch neexeyaacheete; gondoon shuunechinaꞌo bullin shixxehine.

⁶ Kootoon yibbaatee beetinaꞌon aalliihine; damee ukkechinaꞌonaa dachechinaꞌonon Doono Yeeri ciigehe.

⁷ Tunebaani ta, wodde ne shoodoona ne kexooch giyemmo taane; yaafoo tuneti ne yaafee kexo waan, neen shatibee goyinnemmo taane.

⁸ Doono Yeero, ta etteenaꞌo taan koyi wochaachemmoyich, ne cadiqittinoona taan yaabibe; ne gommonoo ta aafooch kaachibe.

⁹ Boonoshi noonooch iberoo aalloone; boonoshi gaboo aalliyoo baachiye; boonoshi qettoo qecheeti maashee oppoommone; boonoshi heciyoona dawushiyeete.

¹⁰ Yeero, boonoshi toommooch nallibe; boonoshi koceyoo boonoshi diheecho tunebe; ne toommooch boonoshi hukketoyich, boonoshi wodde xuꞌoyich boonoshin yoohi aalliibe.

¹¹ Tunebaani ne shoobooch giyitinaꞌo bulli emiribeete; bulli aabooch emiroona shoddebeete; ne shigoon shunnii beetinaꞌo neenna oogichi boonoshi emiremmoyich, ne boonoshich deebo tunebe.

¹² Doono Yeero, cadiqe asheenaꞌon diirihine; boonoshin shunnaꞌa, gaachoochoommon boonoshich deebo tunehine.