Shoddo 49 - Kafa Linguistics Project

Gaannoon Gibeno Mullee Mucco Tuno

Shoddechinaꞌochi ukkiroyich, Qoraahi bushiisheenaꞌochi shoddo

¹ Macceenaꞌote, ittoshi bulli ebin waayebote; showee toommooch beetinaꞌote, ellebote.

² Ogoogeenaꞌonaa gishiisheenaꞌonote, gaannechinaꞌonaa girechinaꞌonote, waayebote.

³ Ariyee yibbaatoon yibbaataabeeto taane; ta mullee gaboo shalligoon danii beetone.

⁴ Ta waamon shaahiyeenaꞌo waan gaꞌiyemmo taane; ooge ximboon yexi kaayibee, boonoshi biishoon gettemmo taane.

⁵ Ta etteenaꞌo taan giichiyooba, xuuxee aabooba ta shattemmo, amoyichiye?

⁶ Boonoshi gaannoon gibeneebeeti asheenaꞌoyich, boonoshi gijjoonoo yebeneebeeti gaannechinaꞌoyich, ta shattemmo amoyichiye?

⁷ Asho bi manoon biishoon, woyee bi kashee gatiyoon Yeerich qocon, hakkaache.

⁸ Kashee gatiyoo aaxxoo bi tunetoyich, amoommonolla bi qoccitaa bedaache.

⁹ Maash hamaanoon bulli yemeenoon beemoyich, amoonolla bi qoccitaa bedaache.

¹⁰ Shalligechinaꞌochi qitoo, tuusheenaꞌonaa mullaalleenaꞌonochi aallo, aricheti mooyone; boonoshi gaannoon bareenaꞌoyich dufi hammemminaꞌone.

¹¹ Showoon boonoshi shigoona boonoshi shigiitaa, maasho bulli yemeenoon boonoshi kexo, shiijjeroochee shiijjerooch beddaahaa boonoshi beeyi xaaꞌoon, tunemmone.

¹² Asho bi gaannoona gappaache; gijjeenaꞌochoommon qitemmone.

¹³ Ebi boonoshi qelloon gibeneebeeti tuusheenaꞌonaa boonoshi yibbaatoon waayeebeeti asheenaꞌonochi ixee qoodoone.

¹⁴ Bagoochoommon qitemminaꞌone; qiddoo quyoommon qitoo boonoshin quyemmone; okk hach getaanoon maash hammemminaꞌone; boonoshi ashittino oogee xaaꞌoochee daamaa, oppoochaa oqqemmone.

¹⁵ Tunebaani Yeeri ta kasheen qitee kishoochee shiweree, bi waan daammemmone.

¹⁶ Asho gaannegaata, bi oogo beshii hamigaata, shattaahine.

¹⁷ Bi qitiyooba amoonolla daamaachemmone; bi oogo biinna tookki maash hamaachemmone.

¹⁸ Bi kashee yemeenooch emiroona bi beetaa, mooyo biich kaametoyich bi galleteetaa,

¹⁹ ciroona bekkoon bi beegaachemmi, bi qaabbechinaꞌo waan hammemmone.

²⁰ Asho bi gaannoona gappaache; gijjeenaꞌochoommon qitemmone.