Shoddo 46 - Kafa Linguistics Project

Doono Yeeri Noonna Tookkii Tuno

Shoddechinaꞌochi ukkiroyich, Qoraahi bushiisheenaꞌochi shoddo. Ooge qaaroona shoddeeti shoddo

¹ Yeeri nooch deeboonaa giidoonane; xuuxee aabo bulliichoo no gaachoone.

² Ebich showoo qewetaa, guudinaꞌo baharee daggooch boonoshi dihitaa, shataachone.

³ Aacinaꞌo buugii umbetaa, geppeenaꞌoo aacinaꞌo ceenoochee tiyitona qewetaa shataachone.

⁴ Bi daggooch, Yeerichi katemoon, Beshoo Yeeri beeti yaafe xaaꞌoon emirikkiibeeti, woce aaco beetone.

⁵ Doono Yeeri ebi katemee daggooch bi beetoyich, are katemee koyaa aalleyaachemmine; haree maaddooch Yeeri biin gaachemmone.

⁶ Aageteenaꞌo dulliyeete; taatittineenaꞌo dihiyeete; bi qaaroon bi waayiitaa showoo muujjiye.

⁷ Beshe Mawe Doono Yeeri noonna tookkii beetone; Yaaqobichi Nuggishoo no deeboone.

⁸ Waaree Doono Yeerichi shuunoon beegote; showee toommooch bi deebiti aalloon beegote.

⁹ Koyoon showee toommo bulliichee wokkiihe; maꞌoon tiichiye; ginoonoo tiichii aalliihe; gaachoonoo qaaqqoona michiye.

¹⁰ Kashebote; Yeeri ta tunoon ariibote; aageteenaꞌo daggooch oogemmo taane; showee toommooch oogemmo taane.

¹¹ Beshe Mawe Doono Yeeri noonna tookkii beetone; Yaaqobichi Nuggishoo no deeboone.