Shoddo 44 - Kafa Linguistics Project

Gaachoon Danoyich Corooteeti Corooto

Shoddechinaꞌochi ukkiroyich, Qoraahi bushiisheenaꞌochi shoddo

¹ Yeero, no waamona waayeto noone; wonna, boonoshi yemeenooch ne tuniiton, no qaabbechinaꞌo nooch gettitinaꞌone.

² Aageteenaꞌon ne mochoona yookkaa kichihine; tunebaani no qaabbechinaꞌon bechihine; macceenaꞌon yiikkehine; tunebaani no qaabbechinaꞌochi mooyon kaachihine.

³ Showoon boonoshi woraashito boonoshi goraadoona toonoone; wudoon boonoshi daneto boonoshi mochoona toonoone; boonoshina emiraa, ne aafoon boonoshich ne biriitoyich, ebin tuniito, ne qanne kishoonaa ne mochoonane.

⁴ Yaaqobi wudoon danemmoyich tuniyaabeeti ne, ta Nuggishoo, ta Taatoo neene.

⁵ Neenna no etteenaꞌon kochaa wochiyone; ne shigoona no shixechinaꞌon kotehone.

⁶ Ta gibenaabeeto ta maꞌoona toonoone; ta goraado taan wodiyoon hakkaache.

⁷ Tunebaani no etteenaꞌo waanee noon wodiyemmo, neene; noon shixxii beetinaꞌon yeelliyemmo, neene.

⁸ Bulli aabooch Yeerina yebenehone; ne shigoon bulli yemeenoon galletemmo noone.

⁹ Tunebaani and ne, noon qajjehine; noon giishiihine; no ginee naayinaꞌona tookkii hamon qajjehine.

¹⁰ No etteenaꞌo aafoochee gubb no wottemmoyich tuniihine; no etteenaꞌo noon boggiyeete.

¹¹ Guureyemmi bagoommon noon tuniihine; aageteenaꞌo daggooch noon shaccehine.

¹² Ne asheenaꞌon qalli gatiyoona kemmehine; bede gatiyoon qochiyaꞌa kemaano neene.

¹³ No giyeenaꞌo noon naaggemmoyich, no guudoona beetinaꞌo noon coone congemmoyich tuniihine.

¹⁴ Aageteenaꞌo daggooch no tocheyemmoyich, macceenaꞌo noon qallayoona qelloon qeeqqeriyemmoyich tuniihine.

¹⁵ Heeyo bullin cooneehoye; yeello ta aafoon kaappitone.

¹⁶ Ebiyoo, cooqqirii naageebeetochi qaaroochee tiyitona, shixxechonaa nichoon kichechonochi sheexoochee tiyitonane.

¹⁷ Ebi bulli no toommooch bi waato, neen batteyaano no beetaa, ne wogoon happaano no beetenane.

¹⁸ No mullo gubb wotteyaanoone; no shaaddo ne gommoochee keyaanoone.

¹⁹ Tunebaani noon okereenaꞌo beetoochaa tiichehine; dunne manderoona qerihine.

²⁰ No Nuggishoochi shigoon no batteto gaata, woyee dallaawe nuggishoyich no kishoon no yaggito gaata,

²¹ mullooch aacheeti mooyon bi arii beetoyich, Yeeri ebin xalla kichi beegaacheshe?

²² Ne naboyich qemi qemona noon wuxii beeheete; guureyemmi bagoon shaahiiꞌi noon haddiyeete.

²³ Ta Doonocho, tibe; ne tokketaabeeto amoyichiye? Tibe; bulli yemeenoon noon duppaahine.

²⁴ Ne aafoon badd ne wochaabeeto amoyichiye? No xuuxoonaa no neexxeyoonon aaxxiyaache ne iyaabeeto amoyichiye?

²⁵ Buttooch dihito noone; showooch guufeto noone.

²⁶ Tibe; waaree noon gaachebe; ne shoodoyicha geti noon biishebe.