Shoddo 42 - Kafa Linguistics Project

GUTTINNEE KUXO ( Shoddo 42–72 ) Keccooba Corooteeti Corooto

Shoddechinaꞌochi ukkiroyich, Qoraahi bushiisheenaꞌochi shoddo

¹ Doollee woce aacon bi qaatoommon, ta Nuggishoocho, ta kashe neen qaatiyane.

² Ta kashe Yeerin, beeyechi Nuggishoon shachewehane; hamiree Yeeri aafoon ta beeggemmo aatane?

³ Asheenaꞌo wochii wochii “Ne Nuggishoo aaye?” boonoshi immona, xumoonaa areddoonon, ta acimo taach maayoon tunehe.

⁴ Dofee asheenaꞌon dabbiyaꞌa, boonoshina tookkaa Yeerichi kexooch ta hamon, ililiibee galletee shoddoona baaroon no baaroon, ebi mooyon ta gabimmona ta mullo tiishehe.

⁵ Ta kasheene, ne ayiniibeeto amoyichiye? Ta maacaa ne xuuxaabeeto amoyichiye? Yeerin gibenebe; taan Wodiyechon wochinnoon galletemmo taane.

⁶ Doono Yeero, ta kashe ta maacaa ayinitine; ebich, Yoordaanoosinaa Hermooninoochaa, Mizaari guudoochaa neen gabiyoye.

⁷ Ne aachi haanaatee qaaroona, ikke gejjo bare gejjoon ceeggiye; ne aayonaa ne yuboona ta toommona beshehe.

⁸ Doono Yeeri bi shoodoon areddoona bekkiihe; xumoonoo bi shoddo ta waan beetone; ta kasheechi Nuggishoo waan corootemmo taane.

⁹ Ta Deebe Xaqqo Yeerich, “Amoyich taan battenne? Ta etteenaꞌo taan xuuxiitaa, ayinoona ta shaꞌe beeyemmo amoyichiye?” gettemmo taane.

¹⁰ Ta etteenaꞌo wochii wochii, “Ne Nuggishoo aaye?” iibee taan coonemmona, ta shaawusho tiishehe.

¹¹ Ta kasheene, ne ayinaabeeto amoyichiye? Ta maacaa ne xuuxaabeeto amoyichiye? Yeerin gibenebe; taan Wodiyechonaa ta Nuggishoonon galletemmo taane.