Shoddo 41 - Kafa Linguistics Project

Biiyee Aaboobee Corooto

Shoddechinaꞌochi ukkiroyich, Daawitichi shoddo

¹ Girechon gabiibeeto diireetone; bi xuuxee aabooba Doono Yeeri biin wodiyemmone.

² Doono Yeeri biin quyemmone; kashoona bi beeyemmoyich tuniyemmone; hini showoochaanoo biin diiremmone; bi ettoyichoo beshiiree biin imaachemmone.

³ Biiyeꞌi bi qeyiibeeti qeenoochaa Doono Yeeri biin gaachemmone; biiyoochee biin wodiyemmone.

⁴ Tawoo “Doono Yeero, neen xuqqeto taane; taan maaribe; taan wodiibe” iyo.

⁵ Ta etteenaꞌo taan gondii yibbaateheete: “Aata qitehe? Aata bi shigo batteeyehe?” iyeete.

⁶ Asheenaꞌo taan cacheya boonoshi waabeeto kootooniye; boonoshi mullooch gonde mooyon macii kiciyeete; aroocheenoo maach hammiꞌi aroon bakkiyeete.

⁷ Taan shixxii beetinaꞌo bulli taachon shaashikkeeheete; ta toommoochoo gondoon gabiyeete.

⁸ “Gonde biiyo biin yechitone; bi qeyitoochee tiyaachemmone” iyeete.

⁹ Ta gibeneti ta katini xiboo ta koshon taanna tookkii maato, ta toommooch tiyiye.

¹⁰ Doono Yeero, taach ariqqebe; ta etteenaꞌoyich kaalloon ta wochemmoyich, biiyoochee taan wodiibe.

¹¹ Ta etto ta toommooch wudoo daneyaano bi tunetoyich, taanna ne emiroon ebina ariihoye.

¹² Ta kaamittinoyich taan gaachemmo neene; bulli yemeenoon ne beetooch ta beeyemmoyich tuniyemmo neene.

¹³ Bulli aaboochee bulli aabooch, Israꞌeelee Nuggishoo Doono Yeeri diireebe! Ameena, ameena.