Shoddo 40 - Kafa Linguistics Project

Galletee Shoddo

Shoddechinaꞌochi ukkiroyich, Daawitichi shoddo

¹ Haaꞌiyoona Doono Yeerin quyoye; biyoo ta waan gaꞌee, ta cookoon waayehe.

² Aallee oppoochee, taappoocheenoo taan kichiye; ta baateenaꞌon xaqqee inderee toommooch neechiye; manjiiree ta shaaddemmoyichoo tuniihe.

³ Biyoo andire shoddoon, ta Nuggishoyich tunemmi galletee shoddoon, taach immiye. Meetinaꞌo beegi shattemminaꞌone; Doono Yeerinoo gibenemminaꞌone.

⁴ Doono Yeerin gibeneebeeto, koote nuggisheenaꞌon dabbiibeeti geecechinaꞌo waan wotteyaani asho, diireetone.

⁵ Ta Nuggishoo Doono Yeero, nooch ne tuniiti worganikkiti mooyo woddoone; neenoommo koniyoona aalloone; nooch gaawe mooyon gabito neene; aroon “Awaajji yibbaatebane” ta itaanona haddaa ciyaani woddoone.

⁶ Deejjoonaa buuroonon qaawaano neene; micciibeeti deejjoonaa axaaxee deejjoonon qaawaano neene; tunebaani neechon ta waayemmi waamon taach immehine.

⁷ Aroochee “Sheeree Macaafooch taacho bi kooreetoommon, ebiyoche waato taane.

⁸ Ta Nuggishoo Yeero, ne daaggoon tuniyoona emiriyoye; ne sheeroo ta mullooch beetone” iyo.

⁹ Ooge iitee daggoochaa ne wodiyee woroon gettehoye; Doono Yeero, ne arii beetoommon geton kuxaano taane.

¹⁰ Ne cadiqittinoon ta mullooch aachaano taane; ne gibeneyoonaa ne wodiyoonon gettehoye; ne shoodoonaa ne iberittinoonon ooge iitoochaa aachaano taane.

¹¹ Doono Yeero, ne shoodoon ta waanee wokkiyaahine; ne shoodoonaa ne gibeneyoona bulli aabooch taan quyebeete.

¹² Haddoyee beshiti duꞌo taan giichitone; ta axaaxoo taan yechitoyich ciinon mawiito taane; ta qelli eexoyee beshii woddetone; ta mulloo qitiye.

¹³ Doono Yeero, taan wodiibe; Doono Yeero, kaateree taan gaachebe.

¹⁴ Ta kasheen aalliiya qaawii beetinaꞌo yeellebeete; ikkittinoona tambibeete. Taach gondoon gabii beetinaꞌo yeelleree gubb wottebeete.

¹⁵ Taan “Usha, usha!” ii beetinaꞌo, yeelle keqqibeete.

¹⁶ Tunebaani neen qaawii beetinaꞌo bulli neenna emiri, emiroona wucwuceete. Ne wodiyoon shunnii beetinaꞌo bulli aaboon, “Doono Yeeri oogebe” geteete.

¹⁷ Ta, girecho, amaalli hulloo taane; tunebaani Doono taach gabemmone. Ne, ta gaachoonaa taan wodiyechona neene; ta Nuggishoocho, yagiyaahine.