Shoddo 4 - Kafa Linguistics Project

Yeerin Gibenoona Corooteebeeti Corooto

Shoddechinaꞌochi ukkiroyich, ooge ximboona shoddeebeeti Daawitichi shoddo

¹ Cadiqe ta Nuggishoo Yeero, ta qollegaata taach wochibe; xuuxaa ta beehooba taan gaachehine; taach ariqqebe; ta corootoon waayebe.

² Hini asheenaꞌote, ta oogoon ittoshi giishii beeyemmo aati wottooniye? Gaacaalli mooyon ittoshi shuni beeyemmo, kootoon ittoshi qaawi beeyemmo, aati wottooniye?

³ Doono Yeeri biich qeyiti asheenaꞌon biich bi kaacon ariibote; Doono Yeeri bi waan ta cookigaata waayemmone.

⁴ Ittoshi kaare gaatoona axaaxoon shuuneyaahote; ittoshi qemi beeroochaa cikkiree ittoshi mulloon huushibote.

⁵ Tate deejjoon deejjibote; Doono Yeerinoo gibenebote.

⁶ “Gaawe mooyon koni nooch bekkiiba!” ii beetinaꞌo meetinaꞌone; Doono Yeero, ne aafee biroo no toommooch birebe.

⁷ Maayoonaa woyinee uyoona boonoshi woddetaa emirii beetinaꞌoyee beshe emiroon, ta mullooch geddehine.

⁸ Doono Yeero, diggoona ta beeyemmoyich tuniyaabeeto ne baach tunetoyich, ta qeyaa beegaata, diggoona tokketemmo taane.