Shoddo 39 - Kafa Linguistics Project

Xuuxee Toommooch Beeti Ashi Corooto

Shoddechinaꞌochi ukkiroo Yedutuunich Daawitichi shoddo

¹ Tawoo “Ta heciyoona axaaxoon ta shuuneyaachemmoyich, ta gommon quyemmo taane; gondeenaꞌo ta beetooch boonoshi beemmi aabo bulliich, ta kookkooch lugaamoon geddemmo taane” iyoye.

² Minnakanna getaanoon cikkii beehoye; deꞌe mooyoyichona cikkimmiyoye; tunebaani ta xuuxo beshiye.

³ Ta mullo ta maacaa gaamiye; mooyon kichaa ta kindiyona qaaqqoo aaxxoommon aaxxehe; aroochee tawoo ishichiyo:

⁴ “Doono Yeero, ta kashee ciiroon, ta yemeenee haddoonoo, taach arichiibe; ta eeno am shaaha qamino gaata, taach gete.

⁵ Ta yemeenoon ciixi qaton tuniiꞌa qamichihine; ta kashee yemeeno ne aafoochaa am bedaanoone. Iberoochaa ashi kasho hiinnoommone;

⁶ asho yiirittoommone; bi aajjiibeeto duubooniye; konich bi tunemmo gaata, ariyaanoon gaannoon kiciye.

⁷ “And illa ta Doonocho, ta gibeno konine? Ta gibeno neene.

⁸ Ta axaaxoo bulliichee taan wodiibe; mullaalleenaꞌo taan coonemmoyich tuniyaahine.

⁹ Ebin tuniito ne tunetoyich, minnakanna getaanoon cikkiyoye.

¹⁰ Ne mochee kupphoochee tiyitona ciireto taane; ne naxoon ta waanee wokkiibe.

¹¹ Ashoon bi axaaxoyich noggaa naxehine; bi shuni mooyon piloochoommon aalliihine; iberoochaa asho bulli hiinnoommone.

¹² “Doono Yeero, ne aafooch iibboo ta tunetoyich, ta qaabbechinaꞌochoommon shiqqoo ta tunetoyich, ta qolloon waayebe; ta cookoon ellebe; ta eefon cikki qajjaahine.

¹³ Wotteyaanooch ta hamoyee shiichi, wochinnoon ta emiremmoyich, ne aafoon ta toommoochee badd wochibe” iyo.