Shoddo 38 - Kafa Linguistics Project

Xuuxee Aaboobee Corooto

Daawitichi shalligichee shoddo

¹ Doono Yeero, ne kaaroona taan noggeyaahine; ne kaaree shiixxoonoo taan naxeyaahine.

² Ne shango taan kochitone; ne mochoo taan kephetone.

³ Ne kaaroochee tiyitona, ta meenoyich iiwittino aalloone; ta axaaxoochee tiyitona, ta shaawushoyich diggoo aalloone.

⁴ Ta axaaxoo taan qooxxitone; oogichiꞌi taach maggetone.

⁵ Mullaallo ta tunoochee tiyitona ta mayo shaaqqii oqqiye.

⁶ Goobehoye; kukkaanoo iyoye; heeyo bullin muushenehoye.

⁷ Ta shimetoo qaaqqoo gaamoommon gaamitone; ta achooch iiwoo aalloone.

⁸ Nireto taane; ciroona buriceto taane; ta mullee tiishoochee tiyitona gaashillaabeeto taane.

⁹ Ta Doonocho, ta qaatoo bullin ariibeeto neene; ta tuumo neech aacheeto toonoone.

¹⁰ Ta mullo qicciye; ta giidoo qajjiye; ta aafo yaamehe.

¹¹ Ta biiyoochee tiyitona, ta shunechinaꞌonaa ta nuucheenaꞌona taan qajjiyeete; ta xibeenaꞌoo tayee wokkiyeete.

¹² Taan wuxoyich qaawii beetinaꞌo taach dabboon dabbeheete; gonde mooyo ta toommooch shagon qaawii beetinaꞌo, taan aalliiya yibbaateheete; heeyo bullin ta toommooch koceeheete.

¹³ Tunebaani ta, waayoon hakkaani ulloommon, yibbaatoon hakkaani dudoommon tunehoye.

¹⁴ Iberoochaa, waayoon hakkaani, wochoonoo hakkaani ashoommon, tuneto taane.

¹⁵ Doono Yeero, neen gibenehoye; ta Doono ta Nuggishoocho, ne taach wochemmo neene.

¹⁶ “Ta etteenaꞌo ta toommooch emiremmoyich, ta baatoo giinniyooba ta toommooch boonoshi geecemmoyich, tuniyaahine” iyaꞌa neen qollehoye.

¹⁷ And dihooch beddeto taane; ta biiyo ta waanee kuxeyaache itone.

¹⁸ Ta xuꞌoon aanniyoye; ta axaaxoo taan xuuxiitone.

¹⁹ Ta etteenaꞌo giidechinaꞌone; naboo aalloon taan shixxii beetinaꞌo meetinaꞌone.

²⁰ Deꞌe mooyon ta tuniitoyich, deꞌee kaalloon gondoon wochii beetinaꞌo taan shixxiyeete.

²¹ Doono Yeero, taan duppaahine; ta Nuggishoocho, tayee wokkaahine.

²² Taan wodiyechi ta Doonocho, kaateree taan gaachebe.