Shoddo 37 - Kafa Linguistics Project

Gondeenaꞌonaa Deꞌeenaꞌonochi Ciiro

Daawitichi shoddo

¹ Gondeenaꞌochi naboona ippeyaahine; hukkoo shuunee beetinaꞌona qanaateyaahine.

² Mocoochoommon kaate shuuqqemminaꞌone; mocee nolloochoommon shoollemminaꞌone.

³ Doono Yeerin gibenebe; gaawe mooyonoo tuniibe; showee toommooch diggoona beeyemmo neene.

⁴ Doono Yeerina emiribe; biyoo ne mullee qaatoon neech immemmone.

⁵ Ne gommon Doono Yeerich beshii imbe; biin gibenebe; biyoo neen gaachemmone.

⁶ Ne cadiqittinoon ceechoommon, ne dayinnetoon areddee aaboommon, bi aaxxemmoyich tuniyemmone.

⁷ Doono Yeeri aafooch cikkiree beebe; haaꞌiyoona biin quyebe. Gondoon gabiibeeti ashich, mooyo kaamoona ippeyaahine.

⁸ Ippoochee wohe; kaaree shiixxoon qaye; gondooch neen bechemmo bi tunetoyich ippeyaahine.

⁹ Gondeenaꞌo aallemminaꞌone; tunebaani Doono Yeerin gibenee beetinaꞌo, showoon woraashemminaꞌone.

¹⁰ Giisheche aaboyee gubb, gondeenaꞌo kaateree aallemminaꞌone; boonoshin ne qaawitaanona daneyaachemmo neene.

¹¹ Boonoshi qelloon giishii beetinaꞌo showoon woraashemminaꞌone; beemi gaawoonaa diggoona beemona emiremminaꞌone.

¹² Gonde asho cadiqo toommooch koceehe; biichoo gashoon shaacciye.

¹³ Gondeenaꞌochi aallee aabo katinon bi arii beetoyich, Doono Yeeri boonoshi toommooch miicciye.

¹⁴ Gondeenaꞌo, girechonaa amaalli hulloonon wuxoyich, gaawe boochechinaꞌon guuroyich, boonoshi goraadoon kaacciyeete; maꞌoonoo yeepphiyeete.

¹⁵ Tunebaani boonoshi goraado boonoshi mullooch kochemmone; boonoshi maꞌo tiishemmone.

¹⁶ Gondeenaꞌoyich beeti meeti gaannoyee, cadiqoyich beeti giishecho beshiye.

¹⁷ Gondeenaꞌochi mochoo tiishemmone; tunebaani Doono Yeeri cadiqeenaꞌon quyemmone.

¹⁸ Doono Yeeri oonaalli asheenaꞌochi yemeenoon ariihe; boonoshi iristo bulli yemeeneechone.

¹⁹ Gonde yemeenooba yeelleyaachemminaꞌone; shaacee yemeenooboo michemminaꞌone.

²⁰ Tunebaani gonde asheenaꞌo aallemminaꞌone; Doono Yeerichi etteenaꞌo gaddeexi mocoochoommon oojjemminaꞌone; cufoochoommonoo naayi aallemminaꞌone.

²¹ Gonde asho eretteechii qocaache; tunebaani cadiqo kishoon maggiiꞌi wojjiye.

²² Doono Yeeri diiritinaꞌo showoon woraashemminaꞌone; tunebaani bi uppitinaꞌo aallemminaꞌone.

²³ Doono Yeeri ashi boochoona bi emirigaata, bi shaaddoon manjoo tuniyemmone.

²⁴ Doono Yeeri bi kishoona bi yechii beetoyich, bi tepheetaanona dihaache.

²⁵ Gurimaashaꞌa geeneto taane; cadiqe asho duppetaa, bi bushiishoo kosho qolletaa, beegaano taane.

²⁶ Biyoo bulli aaboon wojjiye; erettiinoo iye; bi bushiisheenaꞌoo diireeton tuneheete.

²⁷ Gondoochee wohe; gaawe mooyonoo tuniibe; bulli yemeenoon beeyemmo neene.

²⁸ Doono Yeeri dayinnetoon shunniye; bi yaafeenaꞌon dufaache. Boonoshin bulli yemeenoon quyemmone; tunebaani gondoochi shiijjeroo aallemmone.

²⁹ Cadiqeenaꞌo showoon woraashemminaꞌone; bulli yemeenoon arooch kotemminaꞌone.

³⁰ Cadiqe ashi noonoo ariyoon yibbaatehe; bi heciyoo dayinnetoon yibbaatehe.

³¹ Bi Nuggishoochi sheeroo bi mulloochiye; bi baatoo giini muricaachemmone.

³² Gonde asho cadiqoon hillee dabbiye; biin wuxiya qaawiye.

³³ Tunebaani Doono Yeeri bi kishooch beshiiꞌi imaache; taggoochaanoo bi xoobbemmoyich tuniyaache.

³⁴ Doono Yeerin gibenebe; bi getoonoo ceechibe. Biyoo showoon ne woraashemmoyich tuniyoona neen oogiyemmone; gondeenaꞌo aalletaa beeggemmo neene.

³⁵ Maaci manje gonde asho kaama ciixeꞌi Libanoosee yigoochoommon bi waarwaaritaa, beeggehoye.

³⁶ Wochinnoon aroona beshaꞌa biin muccehoye; ta qaawaa arooch aallehe.

³⁷ Oonaalli ashoon ciine; kaame ashoonoo beege; digge ashi shiijjeroo kuxeyaachemmone.

³⁸ Tunebaani axaaxechinaꞌo ikkittinoona aallemminaꞌone; gonde ashi shiijjeroo dooggemmone.

³⁹ Cadiqeenaꞌoyich wodoo woyemmo Doono Yeer waaneeniye; xuuxee aabooba boonoshich deeboone.

⁴⁰ Bi shoobooch boonoshi giyitoyich, Doono Yeeri boonoshin gaache wodiyemmone; gondeenaꞌo kishoochee boonoshin wodiyemmone.