Shoddo 36 - Kafa Linguistics Project

Ashi Gondittinoonaa Yeerichi Deꞌittinoona

Shoddechinaꞌochi ukkiroyich, Doono Yeeri guuno Daawitichi shoddo

¹ Axaaxecho gonde mooyon bi mulloona gabiye; Yeerin shato bi aafooch aalloone.

² Bi qelloon wochii dawushii beetone; ebiyoo bi gondoon shalligoonaa shixonon qaawoo bi qajjitoyichiye.

³ Bi yibbaatoo maroonaa dawushoonane; shalligoona shuunoonaa deꞌe mooyon tuniyoonon qajjiye.

⁴ Bi qeenoochaa gondoon gabiye; gaaweyaani gommo waan wottehe; gonde mooyon shixaache.

⁵ Doono Yeero, ne shoodo shimaayooch beddaahaa, ne gibeneyoo gumooch beddaahaa shaggitone.

⁶ Ne cadiqittino ooge guudinaꞌoommone; ne dayinnetoo aachi dechi duchoommone; Doono Yeero, ashoonaa gijjoonon wodiihine.

⁷ Yeero, ne shoodo oogeti aaxxe mooyone; asheenaꞌo ne qoshee yiiroon shoobo tuniiheete.

⁸ Ne kexeexi beshaa beshe maayoochee gifiroon maaheete; emirikkiibeeti ne aacoochee boonoshi uchemmoyich tuniihine.

⁹ Kashoo bullichi xuupho ne tunetoyich, ne bekkoona bekkoon beeggehone.

¹⁰ Ne shoodo, neen arii beetinaꞌoyich, ne cadiqittinoo, mulli kaameenaꞌoyich kuxaaye.

¹¹ Geecechinaꞌochi baatoo taan bi neexxemmoyich, gondeenaꞌo kishoo taan bi yookkemmoyich, tuniyaahine.

¹² Gondeenaꞌochi dihoon ciine; qettoo dugilla wottetinaꞌone; timon hakkaacheete.