Shoddo 35 - Kafa Linguistics Project

Gaachee Danoyich Corooteeti Corooto

Daawitichi shoddo

¹ Doono Yeero, taanna qiiccee beetinaꞌona qiiccebe; taan kochii beetinaꞌon koye.

² Ooge gaachoonaa giishi gaachoonon yeshe; taan gaachoyich tibe.

³ Ne goraadoonaa ne ginoonon kaace; taan yookkii beetinaꞌon koye; ta kasheyichoo “Ta, neen wodiyecho taane” gete.

⁴ Ta kasheen qaawii beetinaꞌo, yeelle giishebeete. Ta toommooch gondoon gabii beetinaꞌo, shaaweeree gubb wottebeete.

⁵ Yongo daammiibeeti maaxxoommon tunebeete; Doono Yeerichi maraakoo boonoshin yoohe.

⁶ Boonoshi gommo manderoonaa giinoona tunebe; Doono Yeerichi maraakoo boonoshin yoohi dabbibe.

⁷ Ebiyoo, naboo aalloon dabboon taach boonoshi dabbetoyich, taan yeshoyich oppoon boonoshi iijjitoyichiye.

⁸ Aallo diqqoona boonoshi toommooch shage; boonoshi dabbeti dabbo boonoshin yeshe; oppooch dihiree aallebeete.

⁹ Aroochee, ta kashe Doono Yeerina emiremmine; bi wodiyoonoo emiri wucwuccemmine.

¹⁰ Ta ashittino bulli neech ishichemmone: “Doono Yeero, hakka guutoon, biyee beshe kuppho waanee, hakka guutoonaa girechonon neexxii hajjiibeeto waanee, wodiibeeto, neenoommo konine?” gettemmone.

¹¹ Gonde asheenaꞌo ta toommooch miixeheete; ta ariyaani mooyon taan echeheete.

¹² Deꞌee kaalloyich gondoon taach wochiyeete; taan shiqqiiheete.

¹³ Tunebaani ta, boonoshi biiyehooba dookoon tahehoye; coomoona ta ashittinoon niriihoye; ta corooto waayemmon mucceꞌi ta waan wottehe.

¹⁴ Ta manoyich woyee ta xiboyich muushenoommon muushenehoye; bi indeech eefoommon ta qelloon yittiiꞌa eeppehoye.

¹⁵ Ta tepheehooba emiroona kiceeheete; ta ariyaani, gonde asheenaꞌo ta toommooch kiceeheete; kuxaanoon taan yangixxiyeete.

¹⁶ Shotaani asheenaꞌo taan cooneheete; taach gashoon shaacciyeete.

¹⁷ Ta Doonocho, cikkii ciini ne beeyemmo aati wottooniye? Ta kasheen boonoshi gonde shuunoochee, aaxxe ta kasheen daahereenaꞌo waanee, wodiibe.

¹⁸ Ooge iitee daggoochaa neen galletemmo taane; kiceeti meeti ashi daggoochaanoo neen naademmo taane.

¹⁹ Baad cikkii taan shixxii beetinaꞌo ta toommooch emiraayeete; naboo aalloon taan shixxii beetinaꞌo ta toommooch xayishaayeete.

²⁰ Diggee yibbaatoon yibbaateyaacheete; tunebaani diggee asheenaꞌo toommooch gonde mooyon koceeheete.

²¹ “Usha, usha! Ne tuniiton beeggeto noone” iibee, ta toommooch cookiyeete.

²² Doono Yeero, ebin beeggeto neene; cikki qajjaahine; ta Doonocho, tayee wokkaahine.

²³ Ta Nuggishoo ta Doonocho, tiyiree ta taggoon taggebe; tiyiree ta mooyon nallibe.

²⁴ Ta Nuggishoo Doono Yeero, ne cadiqittinoommona taach nallibe; ta etteenaꞌo ta toommooch emiraayeete.

²⁵ “No mullee qaatoo ceennite” getiree boonoshi gabemmoyich, “Biin aalliitone” boonoshi gettemmoyich, tuniyaahine.

²⁶ Ta iriteyoona emirii beetinaꞌo yeellebeete; boonoshichoo tambibe. Ta toommooch kaama ciixee beetinaꞌo yeelle giishebeete.

²⁷ Xalloo ta tunoon beegoyich qaawii beetinaꞌo emiribeete; emiroonoo wucwuceete; wochi wochiree, “Bi guunochi diggittinoona emiriibeeti Doono Yeeri oogebe” geteete.

²⁸ Ta heciyoo ne cadiqittinoon, ne galletoonoo heeyo bullin yibbaatemmone.