Shoddo 34 - Kafa Linguistics Project

Deꞌo Bi Tunetoyich Yeerin Galleto

Geyechon shaahiꞌi Abimeleeki aafooch bi giddetoyich yoohaa bi kechiyooba, Daawitichi shoddo

¹ Doono Yeerin bulli aaboon galletemmo taane; bi galletoon ta noonoochee kuxaachemmo taane.

² Ta kashe Doono Yeerina yebenahane; boonoshi qelloon giishii beetinaꞌo waayeree emiribeete.

³ Taanna tookki Doono Yeerin oogiibote; ikkittinoona bi shigoon moogebone.

⁴ Doono Yeer waan corootiyo; biyoo ta corootoon waayehe; ta shattaabeeti mooyo bulliichee taan wodiihe.

⁵ Bi waan ciinnii beetinaꞌo aafo biremmone; boonoshi aafo yeelleyaachemmone.

⁶ Ebi iritecho cookiye; Doono Yeeriyoo waayehe; bi iritoo bulliichee biin wodiihe.

⁷ Doono Yeerin shattii beetinaꞌochi guudoona bi maraakoo kotemmone; boonoshinoo wodiyemmone.

⁸ Doono Yeeri deꞌo bi tunoon ciiniree ariibote; bi shoobooch giyiti asho diireetone.

⁹ Biin shattii beetinaꞌo amoonolla mucceyaachemminaꞌo boonoshi tunetoyich, bi yaafeenaꞌote, Doono Yeerin shatote.

¹⁰ More daahereenaꞌo boonoshi maayemmon mucceꞌi shaacoon hakkiyeete; tunebaani Doono Yeerin qaawii beetinaꞌo amoonolla mucceyaacheete.

¹¹ Ta bushiisheenaꞌote, waaree ta waanee ellebote; Doono Yeerin shaton ittoshich dojjemmo taane.

¹² Kashee genjoon qaatiibeeto, meeti yemeenoon beeꞌi gaawe mooyon beegon, qaawiibeeto, konine?

¹³ Ne heciyoon gondoochee, ne noonoon dawushoochee quyebe.

¹⁴ Gonde mooyoochee wohe; gaawe mooyon tuniibe; diggoona beemon kupphiiree qaawibe.

¹⁵ Doono Yeeri aafo cadiqeenaꞌo waan ciinnii beetone; bi waamo boonoshi cookoon ellehe.

¹⁶ Tunebaani gondeenaꞌochi shalligichoon showee toommoochee aalliyoyich, Doono Yeeri bi aafoon boonoshi waan wochemmone.

¹⁷ Cadiqeenaꞌo cookiyeete; Doono Yeeriyoo waayehe; boonoshi iritoo bulliichee boonoshin wodiihe.

¹⁸ Boonoshi mullo tiishetinaꞌoyich Doono Yeeri katinoone; gibeno kuxxitinaꞌon wodiyemmone.

¹⁹ Cadiqoyich iritoo woddoone; tunebaani Doono Yeeri ebi bulliichee biin wodiyemmone.

²⁰ Bi shaawusho bullin quyemmone; bi shaawushoochee ikkolla tiisheyaachemmone.

²¹ Gonde asheenaꞌon boonoshi gondo wuxemmone; cadiqeenaꞌon shixxii beetinaꞌo toommooch nalleyemmone.

²² Doono Yeeri, bi guuninaꞌochi kashoon biishehe; bi shoobooch giyito toommooch nalleyaachemmone.