Shoddo 33 - Kafa Linguistics Project

Galletee Shoddo

¹ Cadiqeenaꞌote, Doono Yeerich ililibote; kaameenaꞌo biin galleto tatoone.

² Doono Yeerin masinqoona galletebote; aashire qiinechi ooge ximboona biich shoddebote.

³ Andire shoddoon biich shoddebote; ooge ximboon yexi kaayibee ililibote.

⁴ Doono Yeerichi qaaro kaamoone; bi shuunoo bulliyoo gibeneetone.

⁵ Doono Yeeri cadiqoonaa dayinnetoonon shunniye; bi shoodo showoo bulliich ceennitone.

⁶ Shimaayeenaꞌo Doono Yeerichi qaaroona halleeheete; shimaajji halleenaꞌo bulli bi noonoochee kechiti qaaroona halleeheete.

⁷ Baharee aaco bullin ikkooch kiciye; waarwaare aaconoo ikke xaaꞌooch gutiye.

⁸ Showoo bulli Doono Yeerin shate; showee toommooch beeti asho bulli keqqoona bi aafooch neexebe.

⁹ Bi getaa showoo halleehe; bi gettitoyichoo manjiye.

¹⁰ Doono Yeeri aageteenaꞌochi yamoon duubo tuniyemmone; macceenaꞌochi gaboonoo guuppemmone.

¹¹ Doono Yeerichi yamo bulli yemeenooch manjemmone; bi mullee gaboo shiijjeroochee shiijjerooch beddaahaane.

¹² Doono Yeeri bi Nuggishoo tuneti aagetoo, bi iristo tuniiꞌi bi kaacciti maccoo, diireetone.

¹³ Doono Yeeri shimaayoochaa dugilla ciinniye; ashi bushiishoo bullin beeggiye.

¹⁴ Bi beeyi xaaꞌoochaa showee toommooch beetinaꞌo bullin beeggiye.

¹⁵ Boonoshi bullichi mulloon shuuneti aroo, boonoshi shuunoo bullin ciinnii beetone.

¹⁶ Taatoo bi ginee naayi meetona wodaache; ginee anaamo bi giidee beshoona wodaache.

¹⁷ Ginee hareshoona wudoon gibeno duuboone; ginee hareshoo bi giidee beshoona wodiyoon hakkaache.

¹⁸ Ebiyoche Doono Yeeri aafo biin shattii beetinaꞌon, bi shoodoon gibenee beetinaꞌon, ciinniye.

¹⁹ Biyoo boonoshi kashoon qitoochee wodiihe; shaacee yemeenooboo kashoona boonoshi beeyemmoyich tuniihe.

²⁰ Doono Yeerin gibenehone; bi noon gaacheebeeti deeboone.

²¹ No mullo biinna emiriye; ebiyoo yaafe bi shigoon no gibenetoyichiye.

²² Doono Yeero, neen no gibenoommon, ne shoodo no toommooch tunebe.