Shoddo 32 - Kafa Linguistics Project

Bi Axaaxoon Aanniꞌi Maaroon Dano

Daawitichi shoddo

¹ Bi xuꞌo echeti, bi axaaxoo oppeeti asho diireetone.

² Doono Yeeri bi axaaxoon haddaani, bi kashooch dawushoo aalli, asho diireetone.

³ Ta axaaxoon aannoo ta qayiyooba, heeyo bullin ta cookee naboona ta ashittino nirehe.

⁴ Areddoon tuneba xumoon, ne kishoo ta toommooch bi maggetoyich, qaawee gaamoo shuuꞌiiti mooyochoommon, ta hakkoo shoohimiye.

⁵ Ta axaaxoon neech arichiiho; ta gondoonoo aachaano taane; “Ta xuꞌoon Doono Yeerich aannemmo taane” iyoye; newoo ta axaaxoon maarihine.

⁶ Ebich gibeneeti asho bulli bi xuuxee aabooba ne waan corootibe; ooge aalliyee aaco waahooba bi waan shagaachemmone.

⁷ Ne taach aashee xaaꞌoo neene; xuuxoochee taan quyemmo neene; wudee danee shoddoon ta guudoona tuniihine.

⁸ Doono Yeeri ishichiye: “Neen dojjemmo taane; ne hammemmi gommon neech bekkiyemmo taane; neen ciiccemmo taane; neen quyemmo taane.

⁹ Lugaamoonaa shachoonon gedo qayigaata ittoshi waan katinaani, shalligaalli hareshoommonaa biceroommonon tuneyaahote” iye.

¹⁰ Axaaxechinaꞌochi xuuxo woddoone; tunebaani Doono Yeerin gibenee beeton bi shoodo qeremmone.

¹¹ Cadiqeenaꞌote, Doono Yeerina emiribote; emiroonoo wucwucote; mulli kaameenaꞌote, ittoshi bulli ililibote.