Shoddo 31 - Kafa Linguistics Project

Doono Yeerin Gibenee Corooto

Shoddechinaꞌochi ukkiroyich, Daawitichi shoddo

¹ Doono Yeero, ne shoobooch giyeto taane; ta yeellemmoyich tuniyaahine; ne cadiqittinoona taan wodiibe.

² Ne waamon ta waan gaꞌiibe; afaafinoona waaree taan wodiibe; deebe xaqqoon tuneree, manje mishigoonoo tuneree, taan wodiibe.

³ Ne ta deebe xaqqo, ta mishigo neene; ne shigoyicha getiree taan yaabibe; gommonoo taach bekkiibe.

⁴ Ne ta deebo ne tunetoyich, taach shaacheeti shaachoochee taan kichibe.

⁵ Ta kasheen ne kishooch beshiyaꞌa immeto taane; gibeneeti Nuggishoo Doono Yeero, ne taan biishebe.

⁶ Gaacaalli nuggisheenaꞌoyich goyinnee beetinaꞌon shixxehine; tunebaani ta, Doono Yeeri neen gibenehoye.

⁷ Ta iritoon ne beeggetoyich, ta kashe xuuxoon ne ariitoyich, ne shoodoona emirii, emiroonoo wucwuccoye.

⁸ Etto kishooch taan beshiyaꞌa imaano neene; gamini xaaꞌooch ta baateenaꞌon neechihine.

⁹ Doono Yeero, iritee toommooch ta beetoyich taach ariqqebe. Ta aafo ayinoochee tiyitona doojjitone; ta kasho, ta meenoo taahitone.

¹⁰ Ta kasho ayinoona, ta eenoo tuummii beemona, ciiretone; xuuxoochee tiyitona ta hakkoo nirehe; ta shaawushoo shekirehe.

¹¹ Ta etteenaꞌo bulli, beshoonoo ta giyeenaꞌo, taan cooneheete; taan arii beetinaꞌo taan shattiyeete; gommoochaa taan beeggitinaꞌoo ta waanee wokkiyeete.

¹² Qititi ashichoommon batteehoye; tiisheti qiicoommon tunehoye.

¹³ Meeti asheenaꞌochi shaashikkoon waayehoye; bulli boochoona keqqoo beetone; ta toommooch boonoshi koceehooba, ta kasheen aalliyoyich koceeheete.

¹⁴ Tunebaani Doono Yeero, ta neen gibenehoye; “Ne ta Nuggishoo neene” iyoye.

¹⁵ Ta kasho bi beeto ne kishoochiye; taan duꞌiibeeti, ta etteenaꞌo kishoochee taan wodiibe.

¹⁶ Ne aafoon ne guunoyich biriibe; ne shoodoona taan wodiibe.

¹⁷ Doono Yeero, neen ta ceeggetoyich yeellayone. Gondeenaꞌo yeellebeete; minnakanna getaanoon maash hambeete.

¹⁸ Cadiqo toommooch aafee kupphoona yibbaateebeeti, geecoonaa hoxoona ceenniti, koottiibeeti heciyeenaꞌo tippebeete.

¹⁹ Asheenaꞌo aafoochaa neen shattii beetinaꞌoyich ne qanniiti, ne shoobooch giyitinaꞌoyich ne kiciti, ne deꞌittino am shaahoon woddehe!

²⁰ Asheenaꞌochi koceyoochee, ne beeyi xaaꞌooch boonoshin aachihine. Boonoshin taggeebeeti heciyoochee, ne duukkaanooch boonoshin qerihine.

²¹ Giicheeti katemooch ta beehooba, worganeeti bi shoodoon taach bekkiiti, Doono Yeeri galleteebe!

²² Keqqoochee tiyitona, “Ne aafoochee yookketo taane” iyoye; tunebaani taan ne gaachemmoyich ne waan ta cookiyooba, ta qolloon waayehine.

²³ Bi yaafeenaꞌote, ittoshi bulli Doono Yeerin shunote; Doono Yeeri gibeneetinaꞌon quyee beetone; tunebaani geecechinaꞌon bede sheeroon sheeremmone.

²⁴ Doono Yeerin gibeneebeeti ittoshi bulli kupphebote; ittoshi mullo goggebe.