Shoddo 27 - Kafa Linguistics Project

Galletee Corooto

Daawitichi shoddo

¹ Doono Yeeri taach bekkoonaa taan wodiyechonane; ta shattemmo koniniye? Doono Yeeri ta kasheyich deeboone; taan keqqichemmo konine?

² Gonde asheenaꞌo ta meenon maaya boonoshi tiyigaata, ta etteenaꞌo, ta shixechinaꞌoo taan wuxiya boonoshi getigaata, tepheeree dihemminaꞌone.

³ Meeti ginee naayo taan bi giichitaanona ta mullo shataache; koyo ta toommooch bi tiyitaanona, Yeerin gibenehoye.

⁴ Doono Yeerin ikke mooyon qollehoye; aroonoo qaawiyoye; ebiyoo, ta kashee yemeeno bullin Doono Yeerichi kexooch beemon, Doono Yeerichi gaawoon ciinnii worganoon, bi yaafee kexoochaanoo corootooniye.

⁵ Ebiyoo xuuxee aabooba, bi duukkaanooch taan aachemmo, bi duukkaanee maacoo taan qeremmo, shiishe xaqqee toommoochoo taan neechemmo, bi tunetoyichiye.

⁶ And illa, ta guudoona beeti ta etteenaꞌo toommooch, ta qettimixo qaallemmone; ililibee bi duukkaanoochaa deejjoon deejjemmo taane; Doono Yeerich shodde biin galletemmo taane.

⁷ Doono Yeero, ne waan ta cookaabeeti cookoon waayebe; taach ariqqebe; ta corootoon waayebe.

⁸ Newoo, “Taan qaawibote” iyine; Doono Yeero, ta mullo “Neen qaawemmo taane” iye.

⁹ Ne aafoon ta waanee gubb wochiyaahine; kaareree ne guuno waanee badd wotteyaahine; taach gaachoo neene; taan wodiyechi ta Nuggishoocho, taan qajjaahine; taan duppaahine.

¹⁰ Ta nihoonaa ta indeena taan qayi gaatoona Doono Yeeri taan tiqqemmone.

¹¹ Doono Yeero, ne gommon taach dojjibe; ta etteenaꞌochi naboyich tate gommona taan yaabibe.

¹² Koote asheenaꞌo miichoona ta toommooch boonoshi tiyitoyich, ta etteenaꞌochi qaatooch taan beshii immaahine.

¹³ Kashechinaꞌo beeti hini showoochaa Doono Yeerichi deꞌittinoon beeggemmo ta tunoon, gibenehoye.

¹⁴ Doono Yeerin gibenebe; kupphebe; ne mullo goggebe; Doono Yeerin gibenebe.