Shoddo 25 - Kafa Linguistics Project

Doono Yeerina Quyeyoonaa Yaabeyonoyich Corooteeti Corooto

Daawitichi shoddo

¹ Doono Yeero, ta qolloon ne waan bechiyoye.

² Ta Nuggishoocho, neen gibeneto taane; ta yeellemmoyich tuniyaahine. Ta etteenaꞌo taan coonaayeete.

³ Neen gibenee beetinaꞌo yeelleyaachemminaꞌone; baad cikkii dawushii beetinaꞌo yeellemminaꞌone.

⁴ Doono Yeero, ne gommon ta ariyemmoyich tuniibe; ne gommon taach dojjibe.

⁵ Taan wodiyechi ta Nuggishoo ne tunetoyich, ne iberittinoona taan yaabiree dojjibe. Heeyo bullin ta gibenaabeeto neeniye.

⁶ Doono Yeero, wonna beddaahaa nooch bekkiyaabee ne echeti, ne ariqqoonaa ne shoodoonon gabibe.

⁷ Doono Yeero, ta bushittinee axaaxoonaa xuꞌoonon shalligiyaahine; ne shoodoona, ne deꞌittinoyicha getiree taan gabibe.

⁸ Doono Yeeri deꞌoonaa kaamoona bi tunetoyich, axaaxechinaꞌoyich bi gommon dojjiye.

⁹ Boonoshi qelloon giishii beetinaꞌon kaame gommona yaabiye; boonoshichoo bi gommon dojjiye.

¹⁰ Bi wogoonaa bi qociyoonon quyee beetinaꞌoyich, Doono Yeerichi gommo bulli shoodoonaa gibeneyoonane.

¹¹ Doono Yeero, ta axaaxoo woddoo bi tunetoyich, ne shigoyicha getiree taan maaribe.

¹² Doono Yeerin shattiibeeti asho konine? Bi qaawiti gommona biin dojjemmone.

¹³ Mooyo biich mashaamaa beeyemmone; bi yareenaꞌo showoon woraashemminaꞌone.

¹⁴ Doono Yeeri biin shattii beetinaꞌoyich maaci bi mooyon aachaache; bi wogoon boonoshi ariyemmoyich tuniihe.

¹⁵ Ta baatoon olloochee kichemmo bi tunetoyich, ta aafo bulli aaboon Doono Yeer waan ciinniye.

¹⁶ Ta, shiqqoonaa xukketona ta tunetoyich, ta waan wotteree, taach ariqqebe.

¹⁷ Ta mullee iritoo woddetone; xuuxoochee taan kichibe.

¹⁸ Ta xuuxoonaa ta iritoonon beege; ta axaaxoo bullinoo maaribe.

¹⁹ Ta etteenaꞌo, am shaahoon boonoshi woddeto gaata beege; am shaahoon taan boonoshi shixxiibeeto gaatoo beege.

²⁰ Ta kasheen quyebe; taan wodiibe; ne shoobooch ta giyetoyich taan yeelliyaahine.

²¹ Neen gibeneto taane; ta deꞌittinoonaa kaamittinoona taan quyebe.

²² Yeero, xuuxo bulliichee, Israꞌeelin wodiibe.