Shoddo 22 - Kafa Linguistics Project

Ayinii Cookoonaa Galletee Shoddoona

Shoddechinaꞌochi ukkiroyich, Daawitichi shoddo

¹ Ta Nuggishoocho, ta Nuggishoocho, amoyich taan qajjenne? Ta gaashillaa beetaa, taan gaachoochee amoyich wokkenne?

² Ta Nuggishoocho, areddoon cookiyoye; tunebaani waayoon qajjehine; xumoonoo kashaa qeyaano taane.

³ Tunebaani ne, Israꞌeeleenaꞌona galleteeti, taatee qeenooch koteti Yaafe Nuggishoo neene.

⁴ No qaabbechinaꞌo neen gibeneheete; neen boonoshi gibenetaa, boonoshin wodiihine.

⁵ Ne waan cookiꞌi wodiyeete; neen gibeneꞌinoo yeelleyaaneenaꞌone.

⁶ Tunebaani ta hipperoo taane; asho toono taane; ashoona cooneyaꞌa hoxeeto taane.

⁷ Taan ciinnimminaꞌo bulli taan cooneheete; boonoshi heciyoon kaaccii, qelloon qeeqqeriibee ishichiyeete:

⁸ “Doono Yeerin gibenetone; eke biin wodiibe; biin shunniibeeto bi tunegaata, eke biin shiwebe” iyeete.

⁹ Ta indee maacoochee ta shiijjemmoyich tuniito neene; ta indee xanon ta xammaa beehooboo taan quyeto neene.

¹⁰ Ta shiijjehoobee tiijjaꞌa, ne kishooch duppehoye; ta indee taan shiyihoobee tiijjaꞌa, ne ta Nuggishoo neene.

¹¹ Xuuxo ta waan katinnitoyich, taan gaachemmo bi aalletoyich, ta waanee wokkaahine.

¹² Meeti gubbenoochoommon etto taan giichitone; Bashaanee showeexi giidechi gubbeneenaꞌochoommon ta guudoona guudditone.

¹³ Gigeebee yangixxiibeeti daaheroochoommon haawutteꞌi ta waan waaheete.

¹⁴ Ta giidoo qajjiꞌi aacon tunehe; ta shaawusho bulli bi kocoochee shekirehe; ta mulloo maacaa gippee wocoommon wocciye.

¹⁵ Ta giidoo shuuqqii gochoon shaahiye; ta heciyoo ta killooch xaaqqeehe; qitee buttooch taan duppehine.

¹⁶ Guuphiti gonde asheenaꞌo, kunaaneenaꞌochoommon taan giichiyeete; ta kishoonaa ta baatoonooch kochiyeete.

¹⁷ Ta shaawusho haddeehe; ta etteenaꞌo manjii xogii taan ciinniyeete.

¹⁸ Ta tahoon boonoshinaa boonoshina qoodeeheete; ta qamisee toommooch ixoon duppiyeete.

¹⁹ Tunebaani Doono Yeero, ne tayee wokkaahine; taan gaachechocho, kaate waaree taan gaachebe.

²⁰ Ta kasheen goraadoochee wodiibe; aaxxe ta kasheen kunaaneenaꞌochi giidoochee wodiibe.

²¹ Daaheree kookkoochee taan wodiibe; gaahee qaroochee taan shiwebe.

²² Ne shigoon ta maneenaꞌoyich gettemmo taane; iitee daggoochaanoo neen galletemmo taane.

²³ Doono Yeerin shattii beetinaꞌote, biin galletebote; Yaaqobi yareenaꞌote, ittoshi bulli biin oogiibote; Israꞌeelee yareenaꞌote, ittoshi bulli biin shatote.

²⁴ Aroo xukketochi xukkoon qallayii hoxeyaanoone; bi aafoonoo bi waanee badd wochaanoone; tunebaani bi waan bi cookiyooba waayehe.

²⁵ Ooge iitee daggoochaa ta galletaabeeti galleto, bi waato ne waaneeniye; neen shattii beetinaꞌo aafooch ta tiikkeshoon giddiyemmo taane.

²⁶ Girechinaꞌo maaree michemminaꞌone; Doono Yeerin qaawii beetinaꞌo biin galletemminaꞌone; ittoshi mullo bulli yemeenoon emiroona beebe.

²⁷ Showee tuggooch beddaahaa beeti asheenaꞌo bulli Doono Yeerin gabemminaꞌone; bi waanoo wottemminaꞌone; aageteenaꞌochi shiijjereenaꞌo bulli bi aafooch goyinnemminaꞌone.

²⁸ Ebiyoo taatittino Doono Yeericho bi tunetoyich, aageteenaꞌonoo qeejjiibeeto bi, tunetoyichiye.

²⁹ Showee toommooch beeti michitinaꞌo bulli biich goyinnemminaꞌone; maash hammechinaꞌo, kashoona beemoyich hakkoo muccetinaꞌo bi aafooch goyinnemminaꞌone.

³⁰ Woyemmi shiijjereenaꞌo biich maddemminaꞌone; boonoshiyee gubbi shiijjeroyichoo Doono Yeerichon gettemminaꞌone.

³¹ Batt shiijjeyaani asheenaꞌoyich bi cadiqoon, bi tuniiton awaajjemminaꞌone.