Shoddo 21 - Kafa Linguistics Project

Wudoo Danetoyich Giddeti Galleto

Shoddechinaꞌochi ukkiroyich, Daawitichi shoddo

¹ Doono Yeero, biich giidoon ne immetoyich taatoo emiriye; wudoon ne daniitoyich emiroona wucwucciye.

² Bi mullee qaatoon biich immehine; bi qolletonoo biich bayaano neene.

³ Wodde diiroon imona biinna danehine; xalle aachee gubbichoon bi qellooch ukiihine.

⁴ Kashoon ne waanee qollehe; kashee genjoon, bulli yemeenooch biich immehine.

⁵ Ne immeti wudoona beshii oogehe; oogoonaa oogee yiiroonon biich tajjihine.

⁶ Bulli yemeenee diiroon biich immehine; biinna tookkaa ne tunoona biin emirikkihine.

⁷ Taatoo bi gibeneebeeto Doono Yeeriniye; Beshoo Yeerichi shoodoochee tiyitona keqqaachemmone.

⁸ Ne kishoo ne etto bullin, ne qanne kishoo neen shixxii beetinaꞌon, yoohi yechemmone.

⁹ Ne bekkehooba, qaaqqee sheelloochoommon, boonoshin aalliyemmo neene. Doono Yeeri bi kaaree shiixxoona boonoshin aalliyemmone; qaaqqoo boonoshin maayemmone.

¹⁰ Boonoshi shiijjeroon showee toommoochee, boonoshi yaroon ashi bushiisheenaꞌo daggoochee, aalliyemmo neene.

¹¹ Ne toommooch gondoon boonoshi gabitaa, boonoshi maritaa, boonoshich kaameyaachemmone.

¹² Maꞌoon boonoshi toommooch awureree, gubb wotteree boonoshi woccemmoyich, tuniyemmo neene.

¹³ Doono Yeero, ne giidoona ooge bekkebe! Ne hakkoyich shodde, neen galletemmo noone.