Shoddo 2 - Kafa Linguistics Project

Doono Yeeri Kaacciti Taatoo

¹ Aageteenaꞌo koceebeeto amoyichiye? Macceenaꞌo duube gaboon gabiibeeto amoyichiye?

² Showee taateenaꞌo tiyiyeete; Doono Yeerinaa bi huuttiti taatoonochi toommooch, iraasheenaꞌoo ikkittinoona koceeheete; ishichiinoo iyeete:

³ “Noon boonoshi cuchiti sansalatoon kuxone; qoqqaannoon kuxi bayone” iyeete.

⁴ Shimaayeexi bi qeenooch koteto miiccemmone; Doono boonoshin coonemmone.

⁵ Aroochee kaaree shiixxoona boonoshich yibbaatemmone; oogeti kaaroona boonoshin keqqichemmone.

⁶ “Yaafee ta geppoo Tsiyooni toommoochaa ta kaacceti taatoon ukkiriito taane” gettemmone.

⁷ Doono Yeerichi getoon awaajjemmo taane; biyoo taach ishichitone: “Ne, ta bushoo neene; hanaach neen shiyeto taane.

⁸ Taan qollebe; aagetoo bullin neech hajjiyemmo taane. Showoo bullin ne iristo tuniyemmo taane.

⁹ Xuuree gumboona boonoshin buriccemmo neene; nuuqqee qiicoochoommon yiikkemmo neene” itone.

¹⁰ And ebich taateenaꞌote, mullechon tunebote; showee iraasheenaꞌote, ittoshi qelloon ariibote!

¹¹ Doono Yeerin shatona maddebote; qewebeeshoo biich hajjeebote.

¹² Bi ippeyaachemmoyich, gommoochaanoo ittoshi aalleyaachemmoyich, qewebee biich goyinnebote. Ebiyoo bi kaaree shiixxoo kaate bi aaxxeyaachemmoyichiye. Bi shoobooch giyito bulli diireetone.