Shoddo 19 - Kafa Linguistics Project

Halloo Bulli Doono Yeerichi Oogoon Bekkiyoo

Shoddechinaꞌochi ukkiroyich, Daawitichi shoddo

¹ Shimaayoo Yeerichi oogoon gettiye; gumoo bi kishee shuunoon awaajjiye.

² Areddoo areddoyich gettiye; xumoo xumoyich ariyoon awaajjiye.

³ Yibbaatoo tuneba qaaro boonoshich aalloone; boonoshi qaaroo waayeyaanoone.

⁴ Tunebaani boonoshi gettiti qaaro showoo bulliich shaggiye; showee tuggooch beddaahaanoo waayeehe. Biyoo aaboyich shimaayooch duukkaanoon xogitone.

⁵ Woꞌee keno kollee kexoochee keyoommon, aabo kechiye; kupphe anaamo bi wocona emiroommon emiriye.

⁶ Ikke baddi shimaajji tuggoochee kechiye; bare baddi tuggooch qaxiriye; bi gaamoochee aashoon hakkemmo koniyoona aalloone.

Doono Yeerichi Sheeroo

⁷ Doono Yeerichi sheeroo ceenoone; kashoon andiriihe; Doono Yeerichi sheeroo gibeneetone; tuushoon ariyecho tuniihe.

⁸ Doono Yeerichi doyoo kaamoone; mulloon emirikkiye; Doono Yeerichi geto xalloone; ashi aafoyich bekkoon immiye.

⁹ Doono Yeerin shato xalloone; bulli yemeenoon manjiree beeyemmone; Doono Yeerichi geto tato, ceeni iberoone.

¹⁰ Aachoyee, xalle aachoyee beshoon aaxxoone; eeyoyee, eechi woolloyee beshoon shaawone.

¹¹ Ne guuno aroona guyeehe; boonoshin bi quyoonoo oogichii gaachehe.

¹² Bi muricoon shalligoon hakkemmo konine? Aacheeti axaaxoochee ne taan xalliibe.

¹³ Ariibee axaaxoon shuunoochee ne guuno taan quyebe; taan bi hajjaachemmoyich taan gaachebe. Ebiyooba xalloo tunemmo taane; ooge axaaxoochee xallemmo taane.

¹⁴ Taach Deebe Xaqqoonaa taan Biishee Wodiyechona tuneti Doono Yeero, ta yibbaatoonaa ta mullee gaboona neen emirikkibe.